35/2023-2024

Champhai, the 5th April, 2023: District Level Committee on Prandhan Mantri Matsya Sampada Yojana (PMMSY), Champhai District chu vawiin chhun dar 12 khan an Chairman Pu James Lalrinchhana, District Bawrhsap hovin DC Conference Hall-ah an thukhawm a; Centrally Sponsored Scheme Prandhan Mantri Matsya Sampada Yojana (PMMSY) 2022-2023 hnuaia hamthatna dawngtu tur an thlan bakah, Sangha khawi tihhmasawnna tura ruahmanna duan lawk, PMMSY kaltlanga hmalakna tur Champhai District Fisheries Annual Action Plan for Financial Year 2023-2024 thlir hovin an pawm bawk.

Bawrhsap Pu James Lalrinchhana chuan Sangha no intodelh thei tura tanlak chhunzawm zel a pawimawh thu a sawi a. Champhai District chu Sangha thar tam thei tura theihna nei a nih thu sawiin, hriselna atana chaw tha tak a nih avangin Sangha thar chhuah hmanga intodelh thei tur leh thawnchhuah thei tur khawpa tanlak a tul thu a sawi a. Mi nawlpui banphak Sangha thar leh tuihnai, man tlawm zawk a awm theih nana tharchhuah tam lamah tanlak a tul thu sawi bawk.

He hunah hian Pu Lalhmunsanga, DFDO Champhai & Member Secretary, PMMSY District Level Committee chuan meeting agenda leh department hmalaknate a sawifiah a ni.

He hunah hian Prandhan Mantri Matsya Sampada Yojana (PMMSY) 2022-2023 kaltlanga tanpuina diltu hrang hrangte dilna chu tehfung duan sa hmanga zirchian a ni a. PMMSY kaltlanga hmalakna tur 3 hnuaiah hian diltu mi 306 an awm a; heng zinga mi 146 te chu hamthatna dawng tura pawm an ni a. Mi 80 te hi Dil thar siam tur, 38 te chu Dil awmsa Sangha no dah lailawkna Rearing Pond siam tur leh 28 te chu Leilet buh kara Sangha khawi, Paddy cum Fish Culture hamthatna dawng tura thlan an ni.

PMMSY kaltlangin Champhai District Fisheries Annual Action Plan 2023-2024 hnuaiah hian hmalakna tur component 7 duan a ni a, ruahman dan chuan hmalakna tura ruahman atanga senso ngai zat total project cost hi cheng nuai 364.40 a ni a. Cluster Based Location anga kalpui tum niin Dil thar (New Pond) Hectare 15 a zau siam nan cheng nuai 126, Sangha note khawina (Nursery/Rearing Pond) Hectare 8 a zau siam nan cheng nuai 56, Sangha leh buh emaw, ran emaw enkawl kawpna (Integrated Fish Farming) kalpui nan ram Hectare 25 a zauah cheng nuai 25, Sangha chi thar chhuahna Hatchery 2 siam nan cheng nuai 50, Freshwater Aquaculture hnuaia hmalak nan hectare 15 a zauah cheng nuai 60, Bio Floc Pond 3 siam nan cheng nuai 22.50 leh Refrigerated vehicle 1 atan cheng nuai 20 ruahmanna siamte chu ngun taka zirchian hnuah pawm a ni.

Meeting zawh hnu hian PMMSY 2020-2021 kaltlanga Pu F.Laldingliana, Fish Farmer-in Tlangsama Sangho note tharchhuahna Hatchery a siam chu tlawh nghal niin, hmalaknate enfiah a ni.

Pradhan Mantri Matsya Sampada Yojana (PMMSY) kalpui turin Sawrkar lamin senso za zela 60 leh mimalin senso za zela 40 an tum thin a. Sawrkar sen ngai atanga za zela 90 chu Sawrkar laipui tum tur niin, za zela 10 chu State Sawrkar tum tura tih a ni bawk.

Fisheries Department, Champhai tarlan danin kum 2021-2022 chhung khan Champhai District-a Sangha khawitu (Fish Farmer) 1,380 te enkawl Sangha Dil (Fish Pond) Hectare 456.35 a zau atangin Sangha Metric Ton 369.64 thar chhuah a ni.