3135/2022-2023 

Champhai, the 23rd December, 2022: Law & Judicial Minister Pu T.J. Lalnuntluanga, Champhai South bialtu chuan a MLA fund cheng nuai 10 hmanga sak Mizoram Ex-Service Leaque (MESL): Sub-Headquaters Champhai Jai Jawan Stall, Old DC Complex, Champhai Bethel Veng ami chu tukin dar 7:30 khan a hawng.

Law & Judicial Minister Pu T.J. Lalnuntluanga chuan midangte tana malsawmna, sipai bang leh chawmdawl ngaite tanpuina tur Jai Jawan Stall Champhai peihfela hawn a ni thei chu lawmawm a tih thu a sawi a. A puitlin theih nana inlungrual leh inpawhtlang taka hmalakho a ni thinte chu fakawm a ti a. Hmalakna reng rengah mimal hna pawimawh kalsan leh midang phut lova kal ngam a pawimawh thu sawiin, tih turte midang phut mai lova phur taka tih mai leh tih loh turte kalsan ngam chu ram hmasawnna tura pawimawh hmasa anih thu a sawi a. Midangte nundan leh thiltihah buai mai lova mahni kova tla mawhphurhnate tha taka hlen a tul thu sawiin, malsawmna leh hlawhtlinna chang turin mahni kan inpuahchah hmasak a ngai a ni, a ti bawk.

Pu T.J. Lalnuntluanga chuan remna leh muanna, mipuite ralmuanna leh thlamuanna kawnga vanglai nun tam zawk hmangtu sipaite chu chhuanawm a tih thu sawiin, service a awm tawh loh hnuah pawh midangte tana malsawmna ni tura an hnathawh hrang hrangte ngaihhlutawm a tih thu a sawi a. Hmangaihna nen midangte tana malsawmna nih thinlung kan put chhung chuan midangte nena inremlohna tur a awm lo a ni, a ti a. Dam chhung hun reilote chhunga nun nawmna neih tlan nan midangte chhiatna ai chuan an thatna tur kan ngaihtuah hram hram a pawimawh a, hei hian kan ramah rahbi thar leh rahbi tha a chhuah ngei dawn a ni a ti bawk a. Jai Jawan Stall hawn thar chuan Ex-Service chhungkuaah inpumkhatna leh inunauna tha zawk a thlen ngei a beisei thu sawiin, Pathian thuin nang malsawmna ni ang che tia a sawi ataka thlen diktu anih ngei beisei chungin duhsakna a hlan a ni.

Hawnna puala hun hman hi MESL Sub-Hqrs. Champhai President, Honorary Subedar Major Lalparmawia chuan kaihruaiin, Sepoy Upa B. Hranghlira'n hlanna hun a hmang a. Sepoy Vanlaltluanga, Vice President, MESL Sub-Hqrs. Champhaiin report a pe a ni.

Jai Jawan Stall sak hna hi kumin kum bul lam February thla chhoah khan Ex-Service Leaque Champhaite kaltlanga thawh tan a ni a. Zopa chhiara chhawng hnih, adung feet 36 leh avang zauna lai berah feet 15 a ni a, November ni 4, 2022 khan zawhfel a ni.

Mizoram Ex-Service Leaque: Sub-Headquarters Champhai hi October ni 6, 1960 ah Champhai Ex-Service Association ti a din a ni a. MESL Sub-Hqrs. Champhai hnuaiah hian Champhai Town Area bikah Unit 8 awm mekin, pawl member Ex-Service 115, In-Service 157 leh Widow 35 te an awm mek a ni.