No.3023/2021-2022

Aizawl the 17th November, 2021: Zirtawpni kalta November ni 12, 2021 zan atanga ruahsur avanga khawchhak Tuipui lianin Champhai leilet phaizawla harsatna hrang hrang a thlente chu tukin khan Law & Judicial Minister Pu T.J. Lalnuntluanga, Champhai South bialtu MLA ni bawk chuan a hmunah tlawhin a enfiah. Champhai South bialtu MLA hian ruahtui tla nasa avanga a bial chhunga harsatna thleng dangte pawh a tlawh bawk.

Pu T.J. Lalnuntluanga chuan tunhnai ruahsur avanga Champhai leh a chhehvela chhiatna hrang hrang thleng chu pawi a tih thu sawiin, harsatna tawk leh tuartute thinlung taka a tawrhpui thu a sawi a. Tanpui ngaite tanpui leh a tul angte ngaihvena bawhzui vat thintu District Bawrhsap leh a thawhpuite, SP, Line Department hotute, khawtlang hruaitu leh tlawmngaia chhiat tawkte puitu zawng zawngte inpekna leh hmalakna chu fakawm a ti a. Ralkhat atanga thil thlen dan ngaihven mai aiin a hmun ngeia harsatna thlen dante hmuhpui a, hmalak theih dan tur Official leh khawtlang hruaitute sawipui chu a ngaihpawimawh leh tul nia a hriat thu a sawi bawk.

Tuilianin Champhai leilet phaizawla harsatna a thlente, khuarel leh mihring siam chhiatna thleng thin dangte chu inzirthar nan leh hmasawnna kawng kawhhmuhtu atana hman nise a duh thu sawiin, pumpelh emaw, tihnep emaw a nih theih nana tanlak a tul thu a sawi a. Sawrkar Department hotute hmalakna fakawm tiin, harsatna awmte ngaihvena a tul anga hma la zel turin a chah bawk a ni.

Pu T.J. Lalnuntluanga chuan tukin vek khan ruahsur nasa avanga leiminin Ruantlang Mualveng V/C huam chhunga Pi Chuangkimi te chenna In (a ruhrel RCC, a dang Assam Type) November ni 16, 2021 zing dar 7:30 vela a tihchhiat tlusawp chhe vek leh Mualvenga leimin dang awmte chu a tlawh nghal bawk a. A bial chhung Mulkawi khaw panna World Bank Road atanga khaw chhung pawhtu kawng, leimin avanga harsatna awm leh Lungverh Zau, Zotlanga tuilianin harsatna a thlente a enfiah nghal bawk a ni.

Law & Judicial Minister hi Pi Maria C.T Zuali DC, Pu Lalrinpuia Varte SP, Pu Lalduhthlana DFO, Er. Laldingliana Hrahsel EE, I&WRD, Dr. Lallawmkima DIPRO leh Pi Lalzarzovi, ADAO ten an tawiawm a ni.