530/2022-2023
Champhai, the 18th May, 2022: Mizoram Ex-Service Leaque (MESL) Sub-Hqrs Champhai Assembly vawi 17-na Champhai Kahrawt Community Hall-a neih chu vawiin chawhma dar 11:00 khan Law & Judicial Minister Pu T.J. Lalnuntluanga chuan khuallian niin a telpui. He hunah hian District Bawrhsap Pu James Lalrinchhana chu khualzahawm a ni.

Khuallian Law & Judicial Minister Pu T.J. Lalnuntluanga chuan MESL Assembly tluang taka hman a ni thei chu lawmawm tiin, sipai chhungkua atanga seilian a nih angin sipai ngaihsanna leh ram leh hnam tana an inpeknate fakawm a tih thu a sawi a. An zinga a tel thei leh hun tha tak an pe chu vannei a intih thu sawiin, ex-servicemen-te chu mi tlawmngai, inthununna tha tak nei, huaisen leh ram buai laia mipui thlabarte hnema thlamuan thintute an ni, a ti a. An pension hnuah pawh inthununna tha tak nena chhungkua an enkawl thin chu fakawm a tih thu sawiin, an tu leh fate zingah mipuitling tak tak; officer lian, politician, eizawnna kawnga mi hlawhtling tak tak leh a dangte an awm nual chuan inkaihhruaina leh inthununna tha tak chhungkuaah an kalpui thin tih a nemnghet a ni, a ti bawk.

Ex-servicemen-te chu ram tana rohlu tak, remna leh muanna awm theih nana an vanglai hun tha hmangtute an nih thu leh anmahni avanga hmasawnna rahbi zawh theih phah kan nih thu a sawi a. Ram tana nunna hlana inpe ngamte an nih avangin mipuiin an ngaihhlut thu sawiin, vawiin a tel ve ta lo boral tawhte chu hriatreng an nih tawh tur thu a sawi bawk. An nuna entawn tur tam takte thangtharten entawn se a duh thu pawh sawiin, ram tana nunna thapa thatlai hun hlantute atangin thangtharten ram hmangaihna an zir ngei a beisei thu a sawi a. Ram hmangaihna tak takah chuan kut tling lova sum lakluh leh dan lova thil tih a leng lova ni tiin, pawl member-te chu ram hmangaihna tak tak nei tura thalaite zirtirtu nih tum turin a sawm nghal bawk.

Pu T.J. Lalnuntluanga chuan zalenna mitinin kan mamawh theuh rualin mi thenkhat ten social media kaltlangin thu kal dik lo leh belhchian dawl lo, mipuite ti thlabar leh innghirnghona siam thei an tidarh thin chu veiawm tiin, mipuite chu ngaithla liama awih mai lova finfiah hmasa phawt thin turin a chah a. Ngaihtuahna leh rilru hrisel, midangte dem leh tichhe zawng ni lo, a eng zawnga thil thlir thiam tura inzirtir tam deuh deuh a tul thu pawh tarlangin, tuna kan mamawh hmasak ber chu kan rilru sukthlek siam dik hmasak hi a ni, a ti. MESL member-te chu assembly hun hlimawm  tak hmang turin duhsakna a hlan a ni.

Khualzahawm District Bawrhsap Pu James Lalrinchhana chuan pawl ropui tak Mizoram Ex-Service Leaque-in assembly hun tha tak an nei thei chu lawmawm tiin, pawl member la dam leh boral tawhte zahna chibai a buk a. An zingah a mikhual bik loh thu leh sipai chhungkua atanga seilian a nih avangin a indahhran bik loh thu a sawi a. Mahni awmna hmun theuha la invawng tak an ni chu entawntlak a tih thu sawiin, an hnen atangin thalai ten inzir tur an neih tam thu leh mahni taksa leh rilru vawnthat an zir thar a tul takzet thu a sawi bawk.

MESL member-te chu pension tawh mahse ram venhim kawnga mipui leh sipaite inkara inpawhlehzualna a awm theihnan te, inlaichinna kaw zau tak hnawhkhat theitu an nih avangtein inthlahrung hauh lova kailawn tha tak siamtu nih tum turin a chah a. District hmun hrang hranga an inzarpharh chu thlamuanthlak a tih thu sawiin, an tawnhriatte khawtlang leh district tihhmasawn nana chhawr tangkai turin a chah a. Kan zavaia thawhhona kaltlangin district hmasawn leh nuam kan siam ang tih hi ka ring tlat a ni, a ti a. Invawnnunna leh inthununna tha tak an neih chuan thangtharte a chochhuah ngei a beisei tlat thu sawiin, assembly hun tha tak hmang turin duhsakna a hlan a ni.

Thusawitu dang Maj John V.L Khawlhring,  DSW&RO Champhai tarlan danin tun dinhmunah MESL Sub-Hqrs. Champhai hian Undivided Champhai District a huam a, ex-servicemen 800 chuang leh ex-servicemen nupui 200 chuang awm meka chhinchhiah a ni a. World War- II veteran 32 zinga 1 a la dam a ni. DC hmun hluia department ramah tunhnaiah War Memorial cheithat a ni a, Sainik Rest House cum Office leh Jai Jawan Stall sak tuma hmalak mek a ni bawk.

He hun hi an pawl President Hony Sub Maj Lalparmawia chuan a kaihruai a. Upa L/Nk H. Thangliana'n hunserh a hman hnuah Sep PC Lalzuiliana, Secretary in report a pe a. Kum 2018 April atanga 2022 May inkara pawl member boral mi 24 te sunna hun hman a ni a. Chawhnu lamah darbar hawn niin, zawhna leh chhanna hun hman a ni a, MJA Champhai District kaihhruaiin kum 2022-2024 chhunga pawl hruaitu tur thlan a ni a. Sub Rohnaa Sailo, Vice President, MESL Sub-Hqrs Champhaiin lawmthu sawiin hun a khar a ni.