638/2023-2024

Champhai, the 31st May, 2023: Vawiin khan MZP Headquarters Champhai bultumin HSLC leh HSSLC pass thate lawmpuina hun Govt. Champhai College Multipurpose Hall-ah neih a ni a. He hun hi Law & Judicial Minister Pu T.J. Lalnuntluanga chuan khuallian niin a hmanpui a, Dr. ZR Thiamsanga, MLA, Health & Family Welfare Board Vice Chairman chu khualzahawm a ni.

Khuallian Pu T.J. Lalnuntluanga chuan zirlai tithate a lawmpui thu sawiin, chawimawina hun MZP Hqrs. Champhaite'n an buatsaih chu fakawm a tih thu a sawi a. Zirlai kalkhawmte chu tun ai nasa zawka tan la zel tur leh, taima leh rinawm taka lehkha zir chhunzawm zel turin a fuih a. HSLC leh HSSLC pass chu zirna kawtchhuah thlenna hmasa a nih thu sawiin, zirlaite chu he hun atang hian zir nasa zual turin a chah a. Zirna kawnga hlawhtling tur chuan harsatna hrang hrang kan hmachhawn a ngai a, harsatna kan tawhte huaisen taka paltlang zel a tul a ni, a ti bawk.

Law & Judicial Minister chuan zirlaite chu tum bik neia lehkha zir tur leh, midangte nawrna avanga mahni tuina nilo zir mai mai lo turin a chah a. A thiam bik leh chhawr tlak tak takte tan hna thawh tur a awm reng thu pawh sawiin, eng kawng pawh zawh dawn ila, tih tak takna nena chhawr tlaka thiam turin kan beih a ngai a ni, a ti bawk. Zirlaite chu chin tawk neia social media hmang tum tur leh Pathian hre chunga lehkha zir turin a fuih a. Ram leh hnam tana chhawrnahawm tak nih tum tur leh hlawhtlinna chang thei tura theihtawp chhuah zel turin a chah bawk.

Khualzahawm Health & Family Welfare Board Vice Chairman Dr. ZR Thiamsanga chuan zirlai pawlte hmalakna avangin hmasawnna tam tak a thlen tawh thu sawiin, zirlaite chu an zirlaia theihtawp chhuaha ram leh hnam tana chhawr tlak ni thei tura tan la sauh sauh turin a chah a. Kan taimaka kan tumruh phawt chuan hlawhtlinna kan chang ngei ngei dawn a ni, a ti bawk.

He hunah hian HSLC Distinction-a pass te, HSSLC First Division china pass-te bakah zirlai pass kim vekna zirna inte lawmpuina thilpek hlan an ni.

He hun hi MZP Hqrs. Champhai Vice President Lalpianpuia chuan kaihruaiin, President Thangdeihmanga leh MZP General Hqrs. President Pu Lalnunmawia Pautu te hnen atangin thusawi ngaithlak a ni a. Secretary H.Lalruatdika hnen atanga report ngaihthlak niin, Fin. Secretary Lalhmangaihzuala'n lawmthu sawiin he hun hi a khar a ni.