637/2023-2024

Lunglei 31st May 2023 : Government High School, Lunglei kum 70 tlin lawmna pakhat atan vawiin khan an school-ah Science Exhibition buatsaih a nia a, Mizoram Youth Commission Chairman Dr. Vanlaltanpuia chuan khuallian niin a hmanpui.

Science Exhibition hawnna puala inkhawm tawi Pu K. Lalsangkima Teacher, GHSL kaihhruaiah Dr. Vanlaltanpuia chuan thu sawiin zirna lamah khawvelin zau zawkin hma a sawn zel a, kan rama zirlai te pawhin zirna leh zir tur zau zawk inhawng mek hi a hlawhtlinpuitu ni tura rilru siam a pawimawh thu sawiin zirtirtute pawhin an zirlaite formula vawn tir ringawt ni lova khawvela zirna sang leh zau zawk thlir pha tura an hriatna tihzau a tul thu a sawi bawk.

MYC Chairman chuan hmalam huna zirna tur tha atan India hian zirna in leh zirna tha tak tak a nei a, chuta dak pha tura taihmakna leh tum ruhna neih a pawimawh thu sawiin hmalam eng zawk leh tawnhriat neihna atana Science Exhibition buatsaih a ni chu lawmawm a tih thu a sawi a, mizo thalaite lan dan leh inchei dan a changkan tawh viau laiin zirna khawvela an tlahniam zel chu a lungchhiatthlak tiin mizorama zirna hrim hrim chu a bul thum atanga din thara, tuai thar a tul thu a sawi lang bawk.

He huna khual zahawm Pi Lallianzuali Bawitlung, DEO Lunglei pawhin zirlaite, an zirna kawng leh an hmalam hun atana fuihna leh zirtirtute mawhphurhna hrang hrang a sawi lang bawk.

Vawiina Science Exhibition neihah hian Lunglei khawpui chhunga Middle School 4 leh High School 3 atangin Team 18 ten an thil siamte an entir siak a, Lungleia sikul hrang hranga naupangten an tlawh bawk a ni.

He Science Exhibition ah hian Lunglei Government College (LGC)  Assistant Professors- Pu R. Vanlalreia (Botany), Dr. Joseph Lianbuanga (Chemistry) leh Dr. Lalruatfela Renthlei (Physics) te chu judge niin lawmman sem nghal a ni.

High School Section : Participants : team-17

1st Prize - Govt HS Lunglei (Lalramngaihzuali, David R Biakhmingthanga)

2nd Prize - Govt Bazar HS (Jerret Hmingthantluanga, LH Lalbiaknii, Lalrinpuii)

3rd Prize - Govt HS Lunglei (Obeda Vanlalhruaia, Malsawmsangzuala, Zoramchhana)

Middle Section : Participants : team - 2

1st Prize - Baptist English School, Serkawn (Brianna Lalngaihawmi, Lalrozami Pachuau)

2nd Prize - Govt Mount Hermon MS (Lalrochana Pachuau, R. Lalhriatpuii)

Science Exhibition hi naktuk 1st June, 2023 thleng neih tur niin a duh apiang tan Govt High School ah en theihin a awm a ni.