556/2023-2024

Champhai, the 24th May, 2023: Pinehill Adventist Academy Champhai atanga Class X pass thar, Class of 2023 te tana Senior Class Presentation Day, 'A beutiful day begins with a beautiful mindset' tih thupui hmanga buatsaih chu vawiin chawhma dar 11 khan Law & Judicial Minister Pu T.J. Lalnuntluanga chuan khuallian niin a hmanpui.

Pinehill Adventist Academy Champhai Senior Class Presentation Day tum 15-na, Pinehill Futsal Ground-a neihah Khuallian Pu T.J. Lalnuntluanga chuan thu sawiin, Pinehill Adventist Academy Champhai Zirlaite hlawhtlinna chan lawmpuina leh hriatrengna hun buatsaih a ni leh, hemi hmanpui tura sawm a ni chu lawmawm a tih thu a sawi a. Hlawhtlinna hmu thei tura tunhma atanga Pinehill Adventist Academy Champhai hmalaknate hriatpuitu a nih thu sawiin, hlawhtlinna hi thawklehkhata chan mai theih a ni lova, beih hram hramna leh tanrualna avang chauh a awm thei a ni, a ti bawk.

Zirna chu kawng hrang hranga hmasawnna tura pawimawh a nih thu sawiin, Zirlaite chu taimakna, rinawmna leh inthununna tha tak nei chunga lehkha zir thin turin a fuih a. Nunphung pangngai leh nunkawng hrisel zawh tur leh harsatnate paltlanga hlawhtlinna changtu nih tum theuh turin a chah a. Class X pass chu zirna kawtchhuah, khawvel tukverha dah chhuahna leh bultanna hmasa a nih thu pawh sawiin, inelna sang zawka langphate chu mi beidawng ngailo, huaisenna leh tumruhna nei mite an ni, a ti bawk.

Law & Judicial Minister chuan Zirlai kalkhawmte chu tum bulbal tak nei turte, ram leh hnam tana thawk thei leh chhawrnahawm ni thei tura ngaihtuahna dik leh tha nei turte, ram leh hnam tana tangkai theihna ngaihtuah tel thin turtein a chah bawk a. India ram zirna inelna leh exam lian thama langpha thei tura tun atanga ngaihtuahna seng tan turin a chah bawk a. Mahni kutkea ding thei tur leh midangte banbuai lova intodelh thei turte, midangte thil diltu ni lova malsawmna thlensaktu nih tum turtein a chah bawk. Social media-in mihring nuna a chhe zawnga nghawng thalo a neih hrang hrangte tarlangin, Zirlaite chu an zirlai pui theitu nilo thil dang zawngte insum thiam tur leh, social media hman chintawk nei turin a chah a. Sakhuana leh hnam ziarang vawnhim duhlohna thinlung chu hnam ralna tur zia a nih thu sawiin, Zirlaite chu zonun zemawi leh hnam ziarangte ngaihlua humhalh tlattu nih tum turte, diklohna leh hlemhletna laka fihlim tum turte leh Pathian tiha nitina inhlanthar thin turtein a chah a. Hlawhtlinna chang Zirlaite leh Pinehill Adventist Academy Champhaite kalzelna turah duhsakna a hlan nghal bawk.

Thusawitu dang Principal Pu Zothanzauva Pachuau chuan kalkhawmte lawmna thu a sawi a. Minister Pu T.J. Lalnuntluanga hmalaknaa School panna kawngpui tha tak PWD kaltlanga siam a nita te, Graduating Class Zirlaite Study Tour senso buaipui leh Tuidahkhawlna Tanky siam kawnga a tanpuina avangtein School aiawhin lawmthu a sawi bawk a. School tihchangtlun kawnga hmalakna kalpui mekte tarlangin, hlawhtlinna tura Zirtirtu, Zirlaite, Staff leh Nu leh pate inpekna fakawm a tih thu a tarlang bawk.

He hun hi Pu Alonso Vanlalrema leh Pi K.Lalnunpuii te'n kaihruaiin, Class X pass tharte'n Graduation March an nei a. Pastor Remlalnghaka'n hunserh a hmang a. Khuallianin Class X pass tharte kutah Certificate a hlan a. Nu leh pa leh pass tharte aiawh President Lalruatfela te'n thu an sawi bawk a. Subject Letter hmute hnenah thilpek hlan a nih hnuah Pu Rokhuma Sailo in tawngtaina neiin hun hman a khar a ni.

Kumin HSLC Exam result tihchhuah takah khan Pinehill Adventist Academy Champhai atanga exam hmachhawn Zirlai 39 atanga 35 te an pass a, pass percentage hi za zela 89.74 (89.74%) a ni.

Pinehill Adventist Academy Champhai hi kum 1988 ah din a ni a. Nursery atanga Class X thleng zirna awmin Hostel a awm tel bawk a. Tun dinhmunah Zirtirtu 22 leh Zirlai 340 an nei mek a, zirna bakah thimthil hrang hrang zirna an kalpui tel bawk a ni.