555/2023-2024

Dated Serchhip, the 24th May, 2023: Samagra Shiksha hnuaia Grassroot Sports Development Programme (GSDP) Mizoram State Level Football intihsiak hmasa ber chu vawiin khan Serchhip Sports Complex ah neih tan a ni a, Pu K. Saitluanga, MIS, Deputy Director, I&PR chuan khuallian niin a hawng.

Khuallian chuan, Mizo thalaite zingah Football khela eizawng thahnem tak an awm tawh a, an awm belh zel bawk a. Football Players Association of India (FPAI) ten kumina an zinga India Football Player tha ber atana an thlan pawh Mizo tlangval Lallianzual Chhangte a ni. Vawiina intihsiaknaa rawn tel Samagra Shiksha hnuaia Grassroot Football-a bul tan mekte zingah hian India ram aiawha khel thei khawpa theihna nei, player tha tak tak la ni thei tur kan awm ka ring a. Nangmahnia awm theihna haichhuak tura sawrkar hmalakna hlutzia hriain, he remchang hi hmang tangkai ngei ang che u, tiin naupang kalkhawmte a chah a ni Keimahnia theihna awmte haichhuak turin mahni inthununna thate, thuawihna leh taihmakna te a pawimawh a, kan taksa tichhe thei chi lam thil reng reng; zuk leh hmuam leh a kaihhnawih thilah pawh i fihlim ang u. Tin, nitin zirna hlamchhiah a thiang lova, nitin zirna leh sports lama inbuatsaihna hi rem takin a kalkawp thei a ni tih i hrereng ang u, tiin a chah bawk. Mizoram State Level inelna lian thleng thei khawpa Serchhip District in Sports Infrastructure tha a nei tawh hi thil chhinchhiah tlak hmasawnna a ni a, Serchhip DEO leh a thawhpuiten engkim felfai taka an kalpui thei hian Serchhip District Education Department-a thawktute inpekna thukzia a tilang fiah hle a ni, tiin a thlengtute inpeknaah lawmthu a sawi a ni.

Pu Lalremruata, APO, Samagra Shiksha, Serchhip District chuan report pein Grassroot Sports Development Programme chu Samagra Shiksha hnuaia an hmalakna pakhat a nih thu leh kum 2022 atanga kalpui tan a nih thu a sawi a. Mizoram pumah Football hi Centre 13 awmin Aizawl leh Lunglei district ten Centre pahnih ve ve neiin district dangten Centre pakhat theuh an nei a. Hockey, Boxing leh Weightlifting-ah te Centre 7 theuh din tawh niin Badminton zirna Centre paruk he programme hnuaiah hian kalpui mek an ni. State Level Sports Association 5- Football, Hockey, Boxing, Badminton leh Weightlifting te nen thawhhona thuthlung an ziak fel tawh a, State Level Competition hi Boxing, Badminton leh Weightlifting te hi tun hnaiah Aizawlah buatsaih a ni a, Football leh Hockey hi Serchhip district ah nghah niin Hockey hi vawiin atang vekin Thenzawlah khelh a ni a, Football hi Serchhipah khelh a ni ve thung. Tun thla ni 26 khian a kharna neih tura ruahmanna siam a ni. Vawiina bultan football intihsiakah hian Grassroot Football Centre 13 atangin District tin aiawhin team 11 an inlan dawn a, Aizawl leh Lunglei District ten Centre pahnih ve ve nei mah se team khat angin an rawn inlan a, district dang zawngten team khat theuh an nei ang.

A hawnna inkhawm hi Pu R. Vanlalmuka, Addl. DPC & SDEO Serchhip District chuan a kaihruai a. Chairman hian Nl. Lalremsiani, Indian National Hockey Player, tuna South Australia, Adelaide khawpuia Test Match khela awm mekin fuihna thuchah a rawn thawn chu a chhiarchhuak a ni. A Hawnnaah hian Pu Lawmawma, DPC Samgra Shiksha & DEO Serchhip leh a thawhpuite bakah sawm bik midangte an tel a ni.