1525/2022-2023
Aizawl, the 9th August, 2022: Ram hmasawnna hrang hrang buaipuia chawlhkar khat zet New Delhi-a a cham hnuin Law & Judicial Minister, Pu T.J. Lalnuntluanga chuan vawiin khan Serampore College, Kolkata-a Mizo zirlaite leh thawktute a tlawh.

Law & Judicial Minister Pu T.J. Lalnuntluanga chuan Serampore College chu Mizo kristiante thinlunga hmun pawimawh tak changtu a nih thu sawiin, theologian ropui tak takte lo inzir chhuahna a nih angin a hmun tlawh chak berte zing ami a nih thu a sawi a. Serampore College tlawhna hun tha tak a nei thei chu vannei a intih thu sawiin, College a thawktute leh zirlaite fuihna thu a sawi bawk.

Tun dinhmunah Serampore College-ah hian zirtirtu 12 awmin, an zinga mi 5 te chu Mizo an ni a. Zirlai 160 vel awmin, heng zinga 40 vel dawn chu Mizo zirlaite an ni.

Kum tina an lo tih thin angin Serampore College chuan William Carey-a piancham Carey's Day pualin August ni 17, 2022 hian thingphun hnatlang an nei dawn a, Law Minister chuan hnatlangte thingpui inna tur sumfai a hlan a. An kum 200 tlin lawmna puala an buatsaih lehkhabu leh thuziak mawi chu Minister hi an hlan a ni.