No.7494/2020-2021

Sawrkar laipui Ministry of Textiles hnuaia Development Commissioner for Handlooms, New Delhi leh Mizoram Handloom & Handicrafts Development Corporation Ltd. (ZOHANDCO) tangkawp buatsaihin National Handloom Development Programme (NHDP) kaltlangin nithum (February Ni 10-12) awh tur Champhai Special Handloom Expo-2021 chu vawiin chawhma khan Bethel Veng Community Hall, Champhaiah neih tan a ni. Hawnna hun hi Law & Judicial Minister Pu T.J. Lalnuntluanga chuan khuallian niin a hmanpuia, a duh leh mamawhtu a piangte dawr theih turin Champhai Special Handloom Expo-2021 chu a hawng a ni.

Pu T.J. Lalnuntluanga chuan ZOHANDCO hmalakna  kaltlanga  Champhai hmun ngeia mamawhtute  tana remchang tak tur Special Handloom Expo-2021 huaihawt a ni thei chu lawmawm a tih thu sawiin, sawrkar hotulute leh ZOHANDCO Chairman thar hmalakna hnuaia ZOHANDCO tuaihnum a ni leh, kalphung  pangngai taka a kal leh thei chu fakawm a tih thu a sawi a. Hnam ziarang leh nunphung kan neih hrang hrangte chhawmnunga vawnghim zel tur hian mitinte kan pawimawh theuh a ni, a ti. Khawvel changkang zelah hnam changkang zawkte ziarang leh nunphung entawna lak thin a nih thu sawiin, hnam dang ziarang la chhawng reng rengte chuan ngaihsan an hlawh ngai lova, hnam boral tur zia a ni a, an boral chho mek zel a ni, a ti a.  Mahni hnam ziarangte chu zahpui mai lova chawinun zawk a tul thu leh hnam tam takin an ziarang hre lova an hloh tawh thu pawh sawilangin, ‘Mizote hi hnam ziarangah hausa lutukin lang lo mah ila, vawiin ni thlenga kan hnam ziarang kan la humhim zel thei hi hnam changkang zawkte ngaihsan  a ni, a ti bawk. 

Khuallian chuan khawvel thang leh hmasawn zel karah mipuite kan inzinpawlh nasat tawh zia thu tarlangin, hnam upa leh hmasawn zawk te’n Mizoram tlawha kan tihdan phungte hmuh an chak thin  thu a sawi a. Kan culture-te hi zahpui lova kan phochhuah thiam hi a hun takzeta, hei hian Cultural Tourism a tichangtlung thei dawn ni, a ti. Khawvel hriata kan inphochhuah theihna langsar tak chu kan hnam ziarang leh nunphungte hi a nih avangin zahpui lova phochhuak  turin kalkhawmte leh Mizoram mipuite a sawm a. Hnam hrang hrangte hual vel kara leng mizote ziarang leh inthuamnate vawng nung  reng  thei tura ZOHANDCO hmalakna chu chhuanawm a tih thu leh an thahnemngaihna chuan mizote thinlungah nasa taka hna a thawh a beisei tlat thu a sawi a. Special Handloom Expo chuan mizote rilrem zawngin kan nitin nuna incheina leh hmanraw hman thinte her rem thiam se tih leh  hnam ziarang chawisan zel kawnga  mizo mipuite  rilru sukthlek kaihruai thiam theitu nise tih chu a duhthusam a nih thu sawiin, Special Handloom Expo-2021 chu hlawhtling taka neih anih theihna tura duhsakna hlanin a hawng a ni.  

He hun kaihruaitu  ZOHANDCO Chairman Pu C.Lalrammawia chuan ZOHANDCO chuan puantaha ei zawng leh tui mite hmakhua ngaiin kawng a zawn sak thin thu leh thiamhnangdeh chhuah leh hralh chhuahna lam pawh kawng a zawn sak zel thin thu a sawi a. Puantahtute tahchhuah sum a chantir turin Fair leh Expo-te buatsaih thin a ni a, La pawh man tlawm leh man zawka an lei theihna turin chhawpchhuah thin a ni, a ti.  Puantah chu eizawnna ngelnghet leh tlo anih thu tarlangin, vawilehkhatah hlawhtlinpui kher lo mahse beidawnna phenah hlawhtlinna tak tak a awm thin angin hlawhtling tur chuan tumruhna, taimakna leh tuina nena thawh a ngai a ni, a ti a. A hmangtu mizo mipui kan pun zel avangin puantah leh thiamhnangdeha eizawnna chu a la hlawk tawlh tawlh dawn thu sawiin, puantahtute chu an thil siamchhuahte mi te  tana mawihnai, mit la leh lei chakawm tak anih theih nana tan la deuh deuh turin a chah a, lei chakawm lemlo tak tahchhuah chu a hlawk lova, beidawnna siamtu mai chauh a ni, a ti.

ZOHANDCO Chairman chuan sum harsatna avanga Corporation  tihtawp  tur zinga tel  ZOHANDCO chu  sawrkar tharah  tharthawh leh anih thu leh  chak taka hmalak chhunzawm anih thu a sawi a. Mizo mipuite chu hnam ral zia lantir lo tur leh tualchhung siam thuamte   hlutna chang hriaa inbel uar deuh deuh turin a sawm a. Mizo thuam kan inbel thinte chu a ziarang leh rawng inchawih mawi tak, khawvel hnam changkang zawkte thuam aia a ziarang leh inchawih dan pawh nep chuang biklo a nih thu a sawi a. Hnam inthuamna leh tahchhuahte hlut thiam a pawimawh zual zel dawn thu pawh sawiin, hnam dangin kan thuamte mawi tiin lo inbel thin mahse neitu nihna hauh tlat kan tum tur a ni tiin, hemi kawngah hian mizo puan 5 te pawh neitu nihna  Geographical Indication tihfel tawh a ni, a ti. Mimal  sumdawng lian leh hausa zawk te’n hnam thuamte chu sum lakluh nan hman lo tum mahse, puantaha eizawngtu hrang hrangte harsatna siam theitu an nih avangin neitu nihna  Geographical Indication siam turin mizo mipuite lungrual taka kan tanho zel a tul  dawn a ni, a ti bawk.   

He hunah hian sawm bikte hnenah pauntahtute tahchhuah thilpek hlan a ni a. Pu VL. Chhuanga Chhangte, Board of Director, ZOHANDCO chuan lawmthu sawiin hun a  khar a ni. Hawnna programme hman zawh hnu hian khuallianin Champhai  Special Handloom Expo-2021 puala Stall 22 siamte a fangkual a, hemi hnu hian ni thum awh tur Champhai Special Handloom Expo-2021 chu a duh leh mamawhtu apiangte dawr theih tura hawn tan a ni. Handloom Stall-ah te hian Mizoram hmun hrang hrang atanga puantah thiamte kutchhhuak incheina leh hnam thuam hrang hrang mawi tak takte man tlawm zawka zawrh chhuah a ni a, Champhai District mipuite chu Special Handloom Expo-2021 chhim theuh turin an sawm a ni.

Special Handloom Expo-2021 hawnna hun hi Pu Rex  Zarzoliana Vanchhawng SP, Pu R.Lalnghakliana Addl. DC & PD DRDA, Pu George Lalthanngura DAO, Pu Lalrinawma FM, Dr. Lallawmkima DIPRO, Pu C.Vanlalhruaia ARCS, Pu Lalhlimpuia ATO, Pi Laldampuii Khiangte Board of Director, ZOHANDCO leh sawm bik khawtlang hruaitu te’n an telpui a ni.   

Mizoram Handloom & Handicrafts Development Corporation Ltd. (ZOHANDCO) hi kum 1988 a din a ni a.   Mizo hnam thuam chi hrang hrang (Handloom) leh thiamhnangdeh (Handicrafts) hmasawnna  turin chak takin an thawk mek zel a ni.  Tun dinhmunah Mizoramah Handloom Cluster 10 awm mekin, Mizo hnam puan 5; Puanchei, Ngotekherh, Puandum, Hmaram leh Tawlhlohpuan-te hi a neitu nihna Geographical Indication (GI) tag/registration pek tawh kan ni a, Mizo puan pahnih (2)-Mizo Puanchei leh Tawlhlohpuan te hi August Ni 16, 2019-ah register a ni a. A dang pathum (3)-Ngotekherh, Pawndum leh Hmaram-te hi August Ni 22, 2019-ah register an ni bawk. Handicrafts lamah pawh GI registration nei tura hmalak mek a ni bawk.