No.7493/2020-2021

Vawiin chhun khan Serchhip DC Meeting Room-ah Road Protection Squad Meeting chu Bawrhsap Pu Kumar Abhishek, IAS hova neih a ni.

Bawrhsap chuan nikum kum tawp lam atang khan Road Protection Squad te chuan khawpui chhung kawngte a lo that a, a him zawkna atan Village Council Area zawng zawng fang chhuak vekin kawngpui an enkawl dante an zir chian thu a sawi a. Hmalakna eng emaw zat awm tawhin bawhzui ngai thilte pawh a awm thu a sawi. Khawpui chhung paltlangtu National Highway chu tunlai hian siam that mek a ni a, dimdawi leh uluk taka enkawl a tul thu sawiin VC tinte pawh kawngpui enkawl kawnga hmalakpui atan a sawm nghal a ni.

Meeting ah hian Road Protection Squad-in VC Area hrang hrang an enkual atanga hmalakna tur atan an hmachhawpte leh hmalakna thar turte sawi a ni a, kawng kama lirthei hung thinte chungchang sawi niin kawngpui kama lirthei dah thin hi tihtawp dan tur ngaihtuah nise, VC ten lirthei hun khawmna tur ram ruak emaw kawt zawl remchang lo zawng se, hman tangkai dan ngaituah nise, tih a ni. Tin, kawng kama in sakna leh bungraw hrang hrang dah thinte pawh senghawi tura hriattir niin, thenkhat chuan DUDO hnenah bungraw dah lailawk phalna te an dil a, chungte pawh chu a tul anga Road Protection Squad ten enpui nise tih a ni bawk a. Kawngpui neka in sate leh an LSC pawn lam nekte pawh VC ten Revenue Department ah thlenin a tul anga hmalak zel tura tih a ni bawk. Serchhip District Truck Owners Association hnen atangin Truck dinna tur hmun ngaihtuah sak tura ngenna awm chu Chhiahtlang leh Sailiam VC ten ram ruak lo en se, a remchan anga cheibawl zui dan ngaihtuah nise tih a ni bawk a ni.

Meeting hian Village Council tinah Road Protection Squad din nise tih a ni a, chu chuan anmahni huam chhung theuhah kawng humhalh leh venhim hna an thawk anga, hmalakna tur awmte pawh District Level-ah an thlen thin ang a, thuawihlo an awm pawhin VC ten District thuneitute hnenah an thlen thin dawn a ni.

He Meeting-ah hian Pu Lalmuansanga Ralte, Addl. DC, Pi C. Lalduhzuali, SDO(S), Pu PC Laltanpuia, Addl. SP te bakah Road Protection Squad memberte an tel a ni.