No.7492/2020-2021

Tukin khan Food, Civil Supplies & Consumer Affairs Minister Pu K.Lalrinliana, bialtu MLA ni bawk chuan Zophai a tlawh a, nimin lam a hliam tuarte a kan nghal bawk.

Minister Pu K.Lalrinliana hian Zophai a mizo leilet neituten harsatna awm lova an leilette an enkawl theih nan Ramri lui, Bairabi thleng a link road laih dan tur leh eng chhit phei dan turte chu January ni 29, 2021 khan Kolasib DC leh SP te bakah Bairabi khawtlang hruaitute nen a lo enfiah tawh a. Ruahmanna siam bawhzui turin thir hrui kaltir dan tur endiktuten kut an tuar chu pawi a tih thu sawiin hliam tuarte chu a tlawh nghal bawk a ni. Minister chuan Zophai a ramri tihhmasawnna tur a ruahmanna awmte chu kalpui chhunzawm a nih tur thu a sawi a, heng leilet hmun neituten an leilette an enkawl tha lova, hnam dang kutah hun rei tak an dah avangin hnam dangte hian an hauh na ngam ta hie a, heng vanga buaina chhuak thin a nih thu a sawi. Pu K.Lalrinliana chuan thahnemngaihna avanga pawl kal bing bik awm lovin, Sawrkar hotute thu ngaichang chungin inlungrual tak a hmalak nise a duh thu a sawi.

He thil thleng chungchangah hian Kolasib DC Dr.H.Lalthlangliana chuan Hailakandi DC nen inbiakna neih reng a nih thu a sawi a, ramria buaina thleng leh thei ven nan SP Kolasib leh SP Hailakandi te pawh an indawr reng bawk a ni. IR leh CRPF te dah belh nghal niin a hmunah hian SP Kolasib leh SDPO te bakah Zonal Executive Magistrate-ten an awm chilh mek bawk a ni.

Joint Village Council, Bairabi chuan thuchhuah siamin ramri a buaina chungchangah hian Pawl mal, Political Party emaw mimal angin hma lak loh nise tih an rel a. Hnam,khawtlang leh rampum huap anih avangin lungrual tak a chet a tul a, hmalak a tul a nih chuan Joint VC kaihruaina in lungrual tak a hmalak tur a nih thu an thuchhuah ah hian tarlan a ni.

Nimin a hliam tuarte hi Pu H.Vanlalroa, Member, Bairabi North VC, Pu PC Lalhmunsiama leh Biaksanga Dosel, P&E Department a thawkte an ni a, Bairabi PHC-ah enkawl mek an ni a, ngaihtuahawm lutuk an nih loh thu dawn a ni.