Ni hnih awh tur, sorkar Dan hrang hrang zirhona leh intuaitharna, Mizoram Public Prosecuter-te leh Advocate-te tana training buatsaih chu vawiin chawhma dar 10 khan Law & Judicial Minister Pu Lalsawta chuan Aijal Club Conference Hall-ah a hawng.

Minister chuan Sorkar ukil te leh public prosecutor-te chu ram chhunga dikna vawngtu an nih angin an mawhphurhna a sang hle a, an hnathawh leh thahnemngaihna te chu faktlak a ni, a ti a. Private-a thawkte pawisa lakluh ngaihtuahin Sorkar hnuaiah chuan hlawh te tlem zawk mahse an hna an thawk chhe bik lova, an hming pawh a tha a ni, a ti. Tunlai khawvel a sum umna leh ‘commercialisation’ nasa chho zelah Sorkar ukil te chu fihlim tur te, dikna humhimtu tur an nih hre reng chunga, huaisen taka hna thawk zel tur leh, mi dikna humhimna leh zalenna thleng a mawhphurtu an nih avangin an hnaah fimkhur a, muangchang lo turin a fuih a. Training an neih chu tangkai taka hmang tur leh inpawh taka sawihona nei a, hlawk taka zir turin a duh thu a sawi a ni.

Finance changtu ni bawk Minister Pu Lalsawta chuan November ni 9, 2016 atanga India Sorkarin Rs.500 leh Rs.1000 note a tih tawp (demonetization) chungchang sawilangin, pawisa lem, a tak atanga thliar har tak tak ram chhunga leng velin ram economy a tihchhiat theih mai bakah chung pawisa lem te chu hel ho (insurgents) chawm nana hman a nih thin avangin, tuna pawisa tih tawpna hi India ram pum ei leh bar (economy) leh himna (security) vawnhim nana hmalakna tha tak a nih thu a sawi a. A tum a hlawhtlin theih nan sawi lawk theih thil a nih loh avangin tlem a rokhawlhna thleng mahse Pu Lalsawta chuan mipui chiai lo turin a ngen a. Pawisa hi lehkhachhia a nilo a, bank-ah dah luh vek theih niin sumfaia thleng theihna hun pek an ni, a ti. He hmalakna avang hian pawisa lem leh diklo taka sum lakluh te a lang dawn a, rinawm taka thlan tui luanga sum thawkchhuaktute thawhchhuah khan hlutna a neih phah dawn a ni, Finance Minister chuan a ti bawk.

Training hi Law Secretary Pi Marli Vankung chuan a kaihruai a. Vawiin hian Protection of Children from Sexual Offence Act, (POCSO), The Mizoram Land (Revenue) Act, Narcotic Drugs & Psychotropic Substances Act leh CPC chungchanga zirho a ni a. Naktuk hian a hmun ngaiah Land Acquisition, Rehabilitation and Resettlement Act chungchang te, Mizoram Protection of Interest of Depositors Act leh Cr.PC chungchang te zirho zawm a ni leh ang.