October ni 4, 2016 tlaia saberekara khuangkaihin a lak Ramthar Veng naupang palite hriatrengna music video chu vawiin khan Disaster Management & Rehabilitation (DM&R) Minister Pu C.Ngunlianchunga'n I&PR Auditorium-ah a tlangzarh.

Pu C.Ngunlianchunga chuan Ramthar Veng naupang pali Lalpekkimi, Lalpekhlui, Linda Lalnunpuii leh Danny Lalhriatpuia te vanduaina chungchangah naupang thi tate chhungkua, an zirlai puite leh thiante a tawrhpui takzet thu a sawi a. Anmahni hriatrenga atana zaithiam leh mi thahnemngaiten music video an buatsaih chu lawmawm tiin sum leh pai, tha leh zung, ngaituahna sengtute zawng zawng chungah lawmthu a sawi a ni. Minister chuan he vanduaina rapthlak tak a thlen thu Mizo mipuiten an hriat veleh Pathian hnenah an tawngtai a, thi tate ruang hmuh kim a ni chu tawngtaina vang a ni, a ti a. Environment a that tawh loh avangin hmuh lawk leh hriat lawk theih loh khuarel chhiatna tam tak a thleng a. Heng chhiatna laka inven dan inhrilhriat hi a tul hle tiin DM&R Minister chuan nu leh pa, zirtirtute pawhin naupangte zirtir uar deuh deuh turin he hunah a sawm nghal bawk a ni.

October 4, 2016 tlai dar 2:45 vela ruahsur vanga tui lianin Armed Veng, Electric Veng leh Ramthar Veng inrìna, Theihai luiah Ramthar Veng naupang pali - Lalpekkimi, Lalpekhlui, Linda Lalnunpuii leh Danny Lalhriatpuia te a la a. Anmahni hriatrengna turin an pual hian Lalnithangi Sailo (Nitei) hlaphuah "Hawktui Nunrawng" chu zaithiam pakua- Lalthlengliani, Lalbiakzuali, Lawmkimi Chawnghlut, R.Lalhmangaihzuali (Zualbawihi), Ruati Rokhum, John Vanlalpeka, Laithangpuia Kullai, John Hnamte leh Ronald Zothantluanga ten an sa a. A hla thluk hi Thakima Fanai siam a ni. Music Video buatsaih hna hi zaithiam, hla phuahthiam leh rimawi lama tui mite telna Rimawi Robawm buatsaih a ni.