Vawiin khan Law & Judicial Minister Pu Lalsawta chuan Aizawl District chhunga dan bawhchhia a pawikhawihna leh suahsual tuartu mi 13 hnenah zangnadawmna chu Mizoram State Legal Services Authority buatsaihin Aijal Club-ah a sem. He zangnadawmna hi The Mizoram Victims of Crime Compensation (Amendment) Scheme 2016 hnuaia misual kut tuarte enkawlna leh chhawmdawlna atan state sorkarin a ruahman a ni a, vawiina compensation semchhuah hi a vaiin Rs. 33,75,000 a ni.

Minister Pu Lalsawta chuan Victims of Crime Compensation sem thin chu thil lungchhiatthlak tak a nih thu sawiin, heng chhawmdawlnate hi engtik ni ah emaw chuan sem ngai tawhlo tur khawpin khawtlangah sualna hi nawr tawm in awm se a duh thu a sawi a. Suahsualna kut tawrh avanga taksa hmelhemna leh rilru thlabarna te chu awlsam taka ngai awh tura insiam sak theih a nih loh avangin heng thilah hian sorkar chuan kawng engemaw tal a rilru leh taksa enkawlna kawngah vanduai tawkte a chhawk zangkhai theih nan zangnadawmna hi a siam thu a sawi a. Minister chuan sorkarin misual leh sualna do turin theih tawp a chhuah a, a chhuah zel tur thu leh, hemi hlawhtlinna atan tanrual a pawimawh zia sawiin mipui tawiawmna a sawm bawk a ni.

The Mizoram Victims of Crime Compensation (Amendment) Scheme 2016 hnuaia zangnadawmna pek zat hi vanduaina an tawh dan a zirin an hmuh theih zat bithliah a ni a. He zangnadawmna hi misual kuta acid a beihna, pawngsual, naupang chunga hleihlenna, zahmawh rawngkai inchhaihna, thihna, ramtuileilo a awm phah ta te, taksa a kang tuarte leh nu pum chhunga naute boralna leh nau pai theih loh phah ten an dil thei a. Dilna hi ukil kaltlanga buaipui a ngailo a, heng dilna te hi District Legal Services Authority ten MHIP leh YMA te nen enhovin, chumi hnu ah State Legal Services Authority-ah thehluh leh thin a ni.

Vawiina compensation semna programme hi Pu Joel Joseph Denga, Member Secretary, Mizoram State Legal Services Authority chuan kaihruaiin, Pi Lucy Lalrinthari, District & Sessions Judge cum Chairman, Aizawl District Legal Services Authority pawhin thu a sawi a; Compensation dawngtute hnen atangin thusawi ngaihthlak ni bawkin, hun hi Pi R. Lalduhawmi, Secretary, Aizawl District Legal Services Authority chuan lawmthu sawiin hun a khar a ni. Programme-ah hian compensation dawngtute leh an chhungte bakah MHIP leh YMA atangin pawl aiawhte an tel a ni.