Vawiin khan  Pachhunga University College-a Mizo Department buatsaihin Recall Show leh Serkawn Cocert Lehkhabu tlangzarhna hun, Seminar Hall, Pachhunga University College-ah neih a ni a, Pu Joseph Lalhimpuia, MLA-in he hun hi khuallian niin a hmanpui.

Khuallian Pu Joseph Lalhimpuia chuan lehkhabu tlangzarhna hun a hman zawhah thu sawiin kum 1932 ah khan Rev.H.W. Carter-a, Mizoten Zochhawni Pa ti a koh thin chuan Serkawn Middle School zirtirtute chu hla chi hrang hrang-hla lenglawng leh hla pawisawi lo chi hrang hrang  phuaha tan la tura fuihin leh in lamah hei hi lo bawhzui thin turin a fuih a.Zirtirtu hovin  hla chi hrang hrang an phuah hmang chuan concert buatsaih thin a ni ta a.  Hla chauh ni lovin lemchan te pawh concert ah hian a tel ve ziah a, naupangte tan inzirtirna tha tak a ni, a ti.

Pu Joseph Lalhimpuia chuan mihring nun hian thil pangngai reng hi a ning thin a, Serkawn Concert hmang hian naupangte theihna phochhuakin,  nun kaihhruaina tha tak a nih bakah Mizo Literature lama sulsutu pawimawh tak, bung thar  kaitirtu a lo ni a ni, a ti. Kan zirlai lehkhathiamte hi kan ram leh hnam tan in pawimawh em em a, kan pi pute rohlu tlawmngaihna, rinawmna , taimakna, huaisenna, thian chhan thih ngam an nihnate vawng nung zela, Mizo culture leh rohlute vawngnungtu leh mi dang pawh zirtirtu ni turin tan la ang che u tiin Pu Joseph Lalhimpuia chuan a chah a ni.

Dr.Tawnenga, Principal, Pachhunga University College pawhin thu sawiin Mizoten Literature lama hma  sawnna tura  mamawh chu hnam rohlute vawn that a ni a, Mizo tulh tulh a ngai a, chu chu  tu leh fate tan entawn tur leh zir tura pholan a ngai a, chutianga  tih loh chuan  hnam a ding chhuak ngai lo vang  tiin zirlaite chu Mizo hnam nun mawi chawisang zel turin a chah a ni.

Lehkhabu tlangzarh inkhawmah hian Rambuai lai atanga tun hun thlenga Mizote nun dan phung tarlanna Recall Show ropui tak entir a ni bawk.

Serkawn Concert hi kum 1932 atanga kum 1946 thleng khan hman  a ni a, Serkawn Concert atang hian Mizo hla thar 100 chuang chhuakin Mizo hnam hla ropui tak tak a lo pianchhuah phah a ni.