717/2022-2023
Champhai, the 31st May, 2022: Law & Judicial Minister Pu T.J. Lalnuntluanga, Champhai South bialtu MLA chuan a bial chhunga Zirna in pahnih Govt. R.Hranga High School, Kanan Veng leh Champhai South Higher Secondary School, Electric Vengte chu vawiin chawhnu khan a tlawh.

Pu T.J. Lalnuntluanga chuan Zirtirtu leh Zirlaite thahnemngaihna avanga result tha tak a bial chhung Zirna in ten an nei thin chu fakawm tiin, result tha zawk nei thei tura tha thlah lova tang deuh deuh turin a fuih a. Zirtirtu indaihlohnate hriain sawrkarin indaihlohna phuhruk nan dah belh zel a tum thu leh, harsatna leh mamawh an thlente a tul ang zela lo bawhzui sak a tum thu a sawi a. Inthununna tha tak, thuawihna leh nungchang tha chhawmnung zel tura Zirlaite fuihin, an lakah beiseina sang tak a neih thu a hrilh a. Social media chak tak leh thu lengvak tam tak awm mek karah thudik tawk lo leh belhchian dawl lo laka inthiar fihlim thin tura Zirlaite fuihin, midangte dem leh sawichhe mai lova dawmkangtu leh malsawmna thlentu nih tum zawk turin a chah bawk.

Ngaihtuahna dik leh rilru hrisel chu ram mamawh leh hmasawnna tura pawimawh tak a nih thu tarlangin, kan chhungkua, khawtlang leh ram tana tih theih kan neih kan kova tlate rinawm leh taima taka kan hlen a ngai a, chumi tur chuan nakin lawka ram leh hnam innghahna tur Zirlaite hi in pawimawh em em a ni, a ti a. Zirna chu hmasawnna tinreng bultanna, chhung leh kua khaidinna, thenrual siamna leh ram tana mi chhenfakawm nihna kawnga hmahruaitu a nih thu leh, lehkha thiamna mai bakah nunkawng dik zawh kawnga tanlak chu thil pawimawh tak a nih thu a sawi a. Mi tumruh, tum nghet tak neia bei hram hramte chu hlawhtlinna changtute an nih thin thu sawiin, Zirlaite chu beidawng mai lova theihtawp chhuaha hlawhtlinna chang thei tura lehkha zir thin turin a fuih a ni.

DEO Champhai Pu T.T Laltanpuia pawhin Zirlaite fuihna thu a sawi a. Sikul leh a chhehvel landan atangin Zirtirtu leh Zirlaite hmel a lan avangin uluk taka neitu thinlung pua enkawl thin turin a chah a. Zirlaite chu social media hman chin tawk hre tur leh zirlai chauh dah pawimawh hmasa turin a chah a ni.

Govt. R.Hranga High School hi kum 1988 a din a ni a. Tun dinhmunah Zirlai 51 leh Zirtirtu 4 an awm mek a. Kumin HSLC result puan takah khan candidate 19 atangin 17 (89.47%) an pass a ni. Champhai South Higher Secondary School hi Arts subject zirna niin kum 2019 a din a ni a. Tun dinhmunah Zirlai 84 leh Zirtirtu 7 an awm mek a. Vawiina HSSLC result chhuakah khan Zirlai naupang exam hmachhawn 28 atanga 27 (96.43%) ten hlawhtlinna an chang a, subject pakhat ba nei Zirlai 1 a awm a ni.

Law & Judicial Minister hi Pu T.T Laltanpuia DEO, Dr. Lallawmkima DIPRO leh khawtlang hruaituten an tawiawm a ni.