716/2022-2023
Aizawl the 31st May, 2022 : Catalyse Tech Mizoram 2022, Mizoram Science, Technology & Innovation Council (MISTIC) leh AIC SELCO Foundation te buatsaih, Mizoram chhunga khawl siam thiamte inelna, Catalyse Tech Mizoram 2022 chu Ni 30 May 2022 khan Innovation Facility Centre (IFC), MINECO Khatlaah a kharna hun hman a ni.

Kharna inkhawm hi Pu Lalmalsawma Pachuau, Secretary, Planning & Programme Implementation Department chuan Khuallian niin a hmanpui. Pu Lalmalsawma chuan, ‘Khawl siam chhuah tawh tam tak awm mah se, kan ram mamawh mila hman tur, khawl tha leh zangkhai zawk siam chhuah kawngah hma kan sawn zel a pawimawh hle’ a ti a. Intihsiaknaa telte chu mahni tui zawng leh chak zawng piah lamah mipui vantlang mamawh tur khawl tangkai siam kawnga tan la deuh deuh turin a chah a ni.

He intihsiaknaah hian Mizoram hmun hrang hrang atanga khawl siam thiam (innovator) mi 30 tel zingah mi 12 te chuan intihsiakna round hmasa paltlangin final an lut a. Finalist mi 12 te hi lawmman pawisa fai pek vek niin, an tih that dan leh an khawl siam tur atana an mamawh azirin lawmman hi pek an ni. A dawng tam ber ten cheng nuai thum an dawng a, an tih that dan azirin cheng nuai hnih te, cheng nuai khat leh cheng nuai khat hnuai lam dawng te an awm bawk.