No.676/2020-2021

Vawiin khan Law Minister leh Champhai South bialtu MLA nibawk Pu TJ Lalnuntluanga hovin Champhai District Level Task Force on Covid-19 chu DC Conference Hall-ah an thukhawm a. Champhai District chhunga Covid-19 darhzel tur venna atana hmalakna leh mamawhte an sawiho a ni.

Pu TJ Lalnuntluanga chuan Covid-19 beihletna kawnga Official, VLTF leh NGO te  thahnemngaihna chu fakawm a tih thu sawiin, State sawkar pawhin a hma thei ang berah tan a lak nghal thu leh India ramah ramri Luhka  leh Airport-te khar hmasa ber anih mai bakah lockdown kalpui tha ber pawl anih thu a sawi a. State dang atanga ei leh bar leh bungraw dang chawluh kawngah MHA order ang diak diak lo deuhin, State dinhmun thlir chunga permit system anga  siamrem anih hnuah kalpui ani, a ti a. Pathianin Chief Minister kaihhruaina hnuaiah  Sawkar lama hotute,  Kohhran leh NGO te finna min pe a, inkharkhip kan puang hmaa, Task force kan din vat avangin tun thlengin kan la him phah ani, a ti a. Fimkhur chu  invenna hmanraw tha ber a nih thu sawiin, DLTF,  VLTF, NGO leh ram riaka  volunteer te inpeknaah lawmthu a sawi a. Hripui leng chuan economics-ah hmasawnna thlen se,  intodelh thei tura thahnemngaihna min petu nise ka duh hle a ni, a ti bawk. Transport Minister ni bawk chuan June Ni 30 thleng Lirthei document felfai lo te ngaihhnathiam rih an nih dawn thu  a sawi a. Seling leh Champhai inkar double lane siam turah Dulte thleng Contractor award tihfel niin, a chhaklam zawng kilometre 30 vela tih tawi theih a nih dawn vanga enfiah leh tum ani, a ti a. Saitual to Kawlkulh leh Khawzawl to Champhai inkarte resurfacing tih tum anih thu a sawi bawk. 

Ramri depa awm Champhai District chhunga hripui dona kawnga hmalaknate a hmuna tlawha lawmthu sawi tur leh hriatpui tura  lokal anih thu sawiin,  district-a hmalatu lian ber District Level Task Force-te hnen atanga hmalakna leh mamawhte hriat hnuah  hmun hrang hranga VLTF leh ramri duty post thenkhatte  tlawha enfiah tum a ni, a ti a. May Ni 3, 2020 thlenga inkharkhipna dan  kalpui tur chu pawhsei anih dawn leh dawn loh la puanchhuah ni rih lo mahse, hripui do kawngah inlungrual taka kal ho zel angaih thu sawiin, Official,  tlawmngai pawl hrang hrangte leh VLTF viak tha tak takte avangin kan la him zel rih a ni, a ti.

Hripui laka kan him theihna tura Sawrkar hmalakna tha taka zawmtu mipuite fakawm tiin,  Covid-19 do nana penchhuah chu mimal, chhungkua, khawtlang, ram leh khawvel tana kan tih ve theih a ni, a ti a. Covid-19 darhzel tur beihletna kawnga hnathawhte chu ropui tiin, VLTF leh duty  post  hrang hranga mamawh leh tul angte pawh Official lam nena inrawntlanga,  kil hrang hrang atanga  zirchiangin mamawhte  chhawp chhuah zel tum a ni, a ti a. Thlai chi leh mamawh dangte pawh a theih ang anga  ngaihtuah zel tum anih thu sawiin, Covid-19 leh a kaihhnawih chungchang inzirtirna chu  khaw hrang hrangah a remchan dan ang zela  neih nise a duhawm hle ang a ti bawk.

Champhai Bawrhsap Pu Mark Lalthanliana chuan Quarantine Centre pathum leh reserve pakhat siam anih thu sawiin, DPRC Keifangtlang Quarantine Centre-ah mi 2 an awm mek thu leh April Ni 30 hian an chhuah zawh  tur thu a sawi a. Thenawm State Assam, Manipur, Tripura leh Meghalaya  atangin Champhai District mi leh sa  lo haw tur  40 an awm thu sawiin, tuna awm mekte nen an inbanlet tawn thei dawn chiah a ni, a ti a. Chak zawka hmalak aniha mawhphurhna te inchan sem anih theihna turin Nodal Officer  hrang hrang leh Incident Commander te ruat an nih thu leh an kaihhruaina hnuaiah harsatna lian tham awm lova chak taka hnathawh anih thu a sawi a. Chhungkaw tanpui ngai 885 te hnenah  CM Relief Fund, SDRF, MLA Fund leh mi inphalte hnen atanga tanpuina dawn kaltlangin chhawmdawlna pek an nih thu leh  PPE Volunteer Group atangin hmanruate sem nual anih thu a sawi a. DLTF thukhawmin Thawhlehni, Ningani leh Inrinni-ah Bazar hun a siam thu sawiin, ramri venga riakte hriselna leh himna ngaipawimawhin an mamawh ang angte pawh a tul ang zela phuhruk tum anih thu a sawi bawk.

Pu Rex Zarzoliana Vanchhawng, SP Champhai pawhin thusawiin, ramri veng turin March ni 11,2020 atangin Police te an chetchhuah tan tawh thu a sawi a. Tun dinhmunah border post 31 ah Police 90 an duty mek thu leh thla khat ei tur chhawp vek tawh anih thu a sawi a. District chhungah thawhhona tha tak a awm thu sawiin,  Bazar ni apiangin Mask vuah leh Social distancing zawm dante Police kalkuala endik thin anih thu sawiin, hma kan sawn viau zel a ni, a ti a.  A tir atanga tun thlenga thahnemngai taka  Covid-19 beihna tura hmalak chhunzawm zel a ni chu fakawm a tih thu a sawi a. Mipuite chu  ramri kaltlanga dan lo anga thilti an awm anih chuan Social media vela thawndarh mai lova  Police leh Excise lamte hrilhhre hmasa zel turin a ngen a ni. 

Pu VL Chama Hnamte, President SYMA  chuan Border area khuate ramri ah inzarpharh vek tura ngen an nih angin hmalak anih thu sawiin,  ramri ah Camp leh camp inkar inkalpawh theihna tur ke kawng siam vek tum anih thu  leh Camp 1 ah mi 4-5 an awm tlangpui thu a sawi a.  Police  leh YMA thawhhona a tha hle  a,  hnun thenkhatah in duty tawm a ni, a ti a. Khuangthing atanga Vaikhawtlang thleng tha taka venhim niin, Lirthei kal khan leh ke a kal khan te uluk taka venhim anih thu a sawi bawk. Ramria YMA riahbuk  77 te chu  khua tanga km 5-7 a hla deuh vek an nih thu leh  hnam damna turin  theihtawp chhuaha  chet lak an tum thu a sawi a ni.

He hunah hian Pu K.Lalmawia, Chairman, District VC Association;  Pu C.Roliana, President, MUP District Hqtrs Champhai;  Pi Lalhlimthangi Khiangte, President, Sub-Hqtrs MHIP leh Pu Lalhmingmawia Pachuau, President, Champhai District MJA te pawhin thu an sawi bawk a ni.

Meeting zawh hnu hian Pu TJ Lalnuntluanga hian Champhai khawpui huamchhunga VLTF Duty post hrang hrangte tlawhin an hmalakna leh mamawhte a ngaihthlak sak a. Law Minister chuan VLTF te a tlawhna hunah hian hripui leng chu hriat lawksa a ni lo a, ram changkang thlengin an buai em em a, keini pawh ram ropui leh hausa zawkte buai ang thoin buai mah ila thawhhona tha tak hnuaiah kan hmachhawn ani, a ti a. Pathianin Sawrkar, VLTF leh NGO te finna pe a tha taka hripui  hmachhawn  ani chu  lawmawm a ti a, an thahnemngaihna fakin an hmabakte tha taka hlen zel turin a ngen bawk a ni. Ramri ah theihtawp chhuaha duty an awm laia khawchhunga lo inthlahdah chu thil diklo anih thu sawiin, VLTF te tha thlah lova tang mar zel turin a chah nghal a ni.

VLTF tlawhna hunah hian Minister hi Pu Mark Lalthanliana, Bawrhsap; Pu Rex Zarzoliana Vanchhawng, SP leh Dr. Lallawmkima, DIPRO te’n an tawiawm a ni. Ruahman dan chuan  Pu TJ Lalnuntluanga hian naktuk leh naktip lamah hian ramri dep khua VLTF leh ramri duty post te tlawh a tum a ni.

Vawiin vek khan Champhai South bialtu MLA leh Law Minister nibawk Pu TJ Lalnuntluanga hmalaknain bial chhung VLTF te hnenah Buhfai Quintal 150 (Bag 300) semchhuah a ni bawk.