Vawiin chawhma khan Law & Judicial Minister Pu Lalsawta chuan Mizoram Public Prosecutor leh Advocate-te tana training buatsaih chu Aijal Club-ah a hawng a. Training hi ni hnih (November 30 – December 1, 2017) awh tura ruahman a ni.

Law Minister Pu Lalsawta chuan kalkhawmte hnenah chuan in thiamna-ah hian mipui ralmuanna a innghat thuk hle a ni tiin mipui thlamuang taka an khawsak theih nan Public Prosecutor leh Advocate-te an pawimawh a ni, a ti a. Training buatsaih a ni chu lawmawm a tih thu sawiin an hnathawh chu chhuanawm a tih thu a sawi a. Case leh dan hrang hrang tam zelah zir belh ngai a tam tiin training chuan hemi kawngah hian a pui ngei dawn a ni, a ti a. Harsatna an neih te chu inhrilh tawn thin turin a fuih a. Department dang - police, excise leh a dangte nena thawkho thin an nih thu tarlangin tha taka thawhhona nei zel turin a chah a. Training hlawkpui turin leh tangkai taka nei turin duhsakna a hlan nghal a. Minister hovin harsatna hrang hrang sawihona neih a ni nghal bawk a ni. 

Hawnna programme hi Law & Judicial Department Joint Secretary, Pu Zahmingthanga Ralte chuan a kaihruai a. Training chhung hian dan hrang hrang zirhona neih a ni dawn a. Vawiin hian Evidence Act, 1872, The Mizoram Liquor (Prohibition & Control) Act, 2014, Motor Vehicles Act, 1988 bakah Cr. PC leh CPC chungchang zirho niin naktuk lamah The Essential Commodities Act, 1955, The Protection of Human Rights Acts, 1993 & Employees Compensation Act, 1923, The Commercial Courts, Commercial Division and Commercial Appellate Division of High Courts Act,2015 & Mizoram Civil Courts Act,2005, Cr. PC trial of POSCO Cases leh CPC chungchang zirho a ni dawn a. Training-ah hian district hrang hrang atangin mi 35 vel an tel a ni. November Ni 29, 2017 khan Champhai, Kolasib leh Siaha District-a Addl. Public Prosecutor thar te tan practical training  neih a lo ni tawh a ni.