Mizorama zan khat riak tura lokal India President Ram Nath Kovind chuan vawiin tlai khan Raj Bhavan Durbar Hall-ah Basic Services to Urban Poor (BSUP) hnuaia project pali - Lawipu, Durtlang, Edenthar leh Rangvamual a Aizawla mi harsa zawkte chenna tur In sak chu a hawng.

President a nih hnu a Mizoram a lo kal hmasak berah mi harsa zawkte khawsak a lo ziaawm theih nan a ‘Housing Complexes for Economically Weaker Sections’ hawng theia a awm chu lawmawm a tih thu President Ram Nath Kovind chuan a sawi a. He hmalakna hi India sorkarin a ngaih pawimawh berte zing a mi a nih thu leh, New India Goals 2022 thil tum zing ami hlenchhuahna tur a nih thu a sawi a. “New Mizoram tello chuan New India a siam theihloh a ni,” a ti. Kum 1986-a remna thuthlung “Mizo Peace Accord” ziak a ni chu Mizoram chhunga chengten remna leh muanna an duhzia leh hemi kawnga state entawntlak a nihzia a tilang a ni, a ti. State hmasawnna atana kohhran, tlawmngai pawl te leh political party ten thawhhona tha tak an nei chu President hian fakawm a tih thu a sawi bawk.

President chuan India economy thang zelah Mizo thalaite an pawimawh a, ramchhung hmun hrang hranga IT, hospitality leh service sector industry-ah te Mizo nula leh tlangval ten hna an thawk tih leh, an inpekna chu ngaihsanawm a tih thu a sawi a. Mizoram chu lehkhathiam tamna state a nihna te, infiamna lamah pawh Mizote an ber an kaichho zel chu chhuanawm a tih thu a sawi a. NLUP kaltlanga mi harsa zawkte chhawmdawl an nih dan leh NEDP hnuaia entrepreneur-te chawikan an nih chu fakawm a tih thu a sawi. President chuan Act East Policy hlawhtlinna atan Mizoram a pawimawh thu leh, inkalpawhna leh hmasawnna ruangamte  siamin India Sorkar pawhin hma a lak mek zel thu a sawi a ni.

Governor Lt. Gen. Nirbhay Sharma, PVSM, UYSM, AVSM, VSM (Retd.) chuan Mizoram chu India state a ralmuang ber leh a chhunga chengte pawh chenpui nuam tak an nih thu a sawi a. Sorkar leh mipui inlungrualna zarah hmasawnna pawh tluang takin a kal chho zel a ni tiin, Housing Complex pali hawn tak pawh “Smart City” a Aizawl siamna kawnga hmalakna chhinchhiahtlak tak a nih thu a sawi bawk.

Chief Minister Pu Lal Thanhawla chuan India President in BSUP hnuaia hmalakna a hawng chu lawmawm a tih thu a sawi a. He hmalakna bakah hian district dang parukah chhungkaw 1950 chenna In sak a nih tawh thu te, Rajiv Awas Yojana (RAY) hnuaiah chhungkaw 142 chenna tur peihfel tep a nih tawh thu te a tarlang a. Mizoram chu Open Defecation Free (ODF) state hmasa ber ni tura a inpuahchah thu te, Skoch Award for Sanitation through Community Participation’ chawimawina state in a lo dawn tawh thu te leh kum 2010 a “Best Small State for Overall Award” a lo dawn tawh thu te Chief Minister hian a sawi bawk a ni.

Vawiin a hawn tak BSUP project - ‘Housing Complexes for Economically Weaker Sections within Aizawl’ tia hming vuah hi sorkar laipuia Ministry of Housing and Urban Poverty Alleviation hmalakna pakhat, UD&PA Department, Mizoram kaltlanga thawh a ni a. A vaia sum sen zat chu Rs.91.01 crore niin, chhungkaw 1096 an cheng thei dawn a ni. Lawipu EWS Housing-ah hian unit 408 awmin, Durtlangah unit 320, Edenthar ah 208 leh Rangvamualah unit 160 a awm a ni.