Ni hnih chhung awh tur Aizawl Judicial District huamchhung Aizawl, Champhai leh Kolasib-a Public Prosecutor te tana buatsaih training chu vawiin khan, Administrative Training Institute, New Secretariat Complex, Aizawlah Law Minister Pu Lalsawta’n a hawng.

Pu Lalsawta chuan khua leh tui te thlavang hauhtu leh sorkar department hrang hrang te dan hmanga vengtu leh humhalhtu an nih avangin sorkar ukil te hian Court pindan chhungah hna pawimawh bik an thawk a ni, a ti. Sorkar ukilte chu dan lehkhabu atanga an thil zir piahlamah Supreme Court leh High Court rorel tharlam ber ber te an hriat a, internet leh thildang hmang tangkaia hriatna an neih belh zel a tul a ni, a ti a. Thil sual ti tu te dan hmanga hrem an nih hian remna leh muanna nei tura ramin a beihna kawngah hlawk takin ke a pen tih sawiin hremna nat lam tehfung aiin misual te chu hrem lohva chhuah an ni lo tih hriatna hian misual a siam tha zawk a ni, Minister chuan a ti bawk.

Training hawnna inkhawm hi Law and Judicial Secretary Pu P Singthanga’n a kaihruai a. Mizoram Additional Attorney General Pu AK Sharma leh Assam Public Prosecutor Pu Ziaur Kawal ten thupui thlanbik hmangin sorkar ukil te hi ni hnih chhung training an pe dawn a ni.