IITF-2012 New Delhi-a Pragati Maidan-a neih mekah Mizoram Pavilion Hall No 16 tlawh tute’n Hnam Chhantu Pawl dawr an ngaihven hle a, hmunphiah chungchangah state dang leh exporter atangte in business enquiry engemaw zat an dawng a. An thil siam hrang hrang, a bikin wooden electrical extension board chu visitor ten an ngai hlu a, thahnem tak an an hralh chhuak a ni.

Hnam Chhantu Pawl hian Delhi, Bihar, Mumbai leh Punjab bakah UK lama exporter te nen uluk zawk a in dawr zawm turin an in be fel tawh bawk. Heng business enquiry nei tu te hian thla tin hmunphiah 2000 emaw truck trip khat tal an mamawh thin tur thu an sawi a ni. Hmunphiah hi sumdawng chi hnih in an ngaihven a, a hmunphiah siam sa a duh an awm laiin siam lohva a kg a duh an awm a; siam loh erawh chu Mizoram atanga thawn chhuah theih a nih dawn tawh loh thu hrilh fiah an ni.

Nimin zing dar 7:45 khan Good Morning India, AIR Live Interview ah Mizoram Pavilion chungchang minute 5 chhung tarlan a ni a, entrepreneurs zat leh product display bakah Mizoram Tourism chungchang te tarlan a ni a, he live interview vang hian visitor an tam lehzual beisei a ni.

Mr B.S. Bedi, President Telemedicine Society of India, Centre for Development of Advanced Computing-a Adviser ni bawk in nimin zing khan Mizoram pavilion a tlawh a, C-DAC team in Mizoram an tlawh hun tur ruahhmanna te siamin Pu P.C. Lallawmsanga, Principal Secretary, Industries Department nen phone in an inbe fel nghal a ni.

Pu P.C. Lallawmsanga, Principal Secretary, Industries Department in Aizawl atangin a ngaihven reng avangin Officials leh Entrepreneurs te an lawm hle a ni.