Vawiin khan Principal Secretary, Revenue Department Pu R.L.Rinawma, IRS chuan Revenue Department officers zawng zawngte ko khawmin Mizorama Registration leh Stamp tih takzeta bul tan dan tur hrilhfiahna a nei a. State dang tih dan leh kalphungte kawhhmuhna a nei bawk.

Meeting-ah hian Mizoram tana hmalak dan tur hmathlirna pawimawh tak an nei nghal a ni. Registration fee (Registration Act 1908) leh Stamp Duty ( Stamp Act, 1899) te kal kawp hi British hun lai atang tawha revenue lakluhna tha tak a ni a. Indawrna (transaction) documents pawimawh chhinchhiahna a ni tel bawk. Tunah hian state dangte chuan revenue vaibelchhe tam tak an la mek a, revenue hnar tha ber pahnihna emaw pathumna emaw a ni reng a. Maharashra State phei chuan kum tin vaibelchhe 9000 chuang an rut a ni. Hemi kawngah hian Mizoram hi India rama hniam ber a la ni.

Mizorama Registration leh Stamp mumal taka kalpui a nih theih nan Cabinet-a pharh turin buatsaih mek a ni.