Zokhawthar Zone Football Tournament 2020, a vawi 21 na chu vawiin khan Zokhawthar Playground-ah neih tan a ni a. Hawnna hun hi Champhai South bialtu MLA leh Law Minister nibawk Pu TJ Lalnuntluanga'n khuallian niin a hmanpui a ni.

Khuallian Pu TJ Lalnuntluanga chuan inkhel thiam tak takte kianga hun a hmang thei chu nuam a tih thu sawiin, thalaite hmakhua ngaia infiamna hunpui buatsaih saktute chungah lawmthu a sawi a. Zokhawthar Zone huamchhunga Football thiam district leh Mizoram huapa langpha chawimawi tlak hmingtha tak takte chu chhuanawm tiin anmahni kaihruaia chhertu Zone leh District Football Association hotute a fak a. Mizoram State Games neih zawh taka Football inelna huanga Champhai South leh North bialin mipa leh hmeichhe inlena huanga hnehna an chang thei chuan District in theihna nasa tak a nei tih a lantir thu a sawi a. Infiammite chu taihmakna leh tumruhna nena theihtawp chhuah tura fuihin, thatchhiatna chu Setana thlawhhma a ni, a ti a. Law Minister chuan mahni leh mahni intanpuite chu Pathianin a pui thin tih tarlangin, tih takzeta beitute chuan hlawhtlinna an chang thin, a ti a. Sawrkarin infiamna tihchangtlungna atan nasa taka hma a lak thu sawiin, Zokhawtharah infiamna hmunhma tha tak kumin chhung ngeia peihfel anih theihna turin hmalak a tum thu a sawi a. Zokhawthar Zone Football Tournament vawi 21 na chu hlimawm leh hlawhtling taka neih aniha infiamna huanga hmasawnna duhawm tak chhawpchhuah anih ngei theihna tura duhsakna hlanin he tournament hi a hawng a ni.

Champhai District Football Association President Pu C.Hualrikhuma pawhin thusawiin, football tournament huaihawt thinte hmangin district leh Mizoram tana hmingtha chherchhuah tum ber a ni, a ti a. Champhai District chu football-ah a hmingthat thu tarlangin, Mizoram State Games neih zawh takah hmeichhia leh mipa team-a champion nihna chuan Zone leh CDFA te thawhona thatzia a tichiang ani, a ti a. CDFA leh 8 One foundation, New Delhi tangkawpin Baby league an kalpui mek thu sawiin, CDFA hnuaiah Grassroot football mumal taka kalpui ani a, India football academy thaahte hemi chhuak hi player 10 vel thun an ni tawh bawk ani, a ti a. Football club hrang hrangte chu registration mumal tak kalpuia, a tam thei ang ber player tha chherchhuah tum tura chahin CDFA tanpuina a hlan nghal bawk a ni.

He hun hi Pu Rochungnunga, Vice President, Zokhawthar Zone Football Association-in a kaihruai a. Pu Lalrinzauva Sailo, Secretary -in report a pe a. Match Commissioner Pu Vanlalhluna kaihhruinain Zokhawthar Zone Football Association hnuaia District leh Mizoram huapa langsar player 4 chawimawina neih niin, Pu Joseph Lalramchuana'n Team tinte intiamkamna a laktir a. Law Minister chuan Zokhawthar Zone Football Association hotute hnenah tanpuina Rs 50000/- a hlan a. He inelnaah hian Zokhawthar Zone Football Association hnuaia Club 10 an inlan dawn a. January Ni 13-20, 2020 thleng a awh dawn a ni. Zokhawthar Zone Football Association hnuaiah hian recognised football club 7 leh unrecognised football club 4 an awm mek a ni.