2337/2022-2023

Aizawl, the 16th October, 2022: October ni 15-16, 2022 chhunga All India Conference of Law Ministers and Law Secretaries, Ekta Nagar, Kevadia, Gujarat-a neihah Mizoram Law & Judicial Minister Pu T.J. Lalnuntluanga chuan Mizoram dinhmun tlangpuite tarlangin mamawhte a thlen. He conference hi Union Law and Justice Minister Pu Kiren Rijiju chuan kaihruaiin, Prime Minister Pu Narendra Modi pawhin video conference kaltlangin a telpui bawk a ni.

He hunah hian Law & Judicial Minister Pu T.J. Lalnuntluanga chuan Mizoram dinhmun tlangpuite tarlangin, dan hlui hman tawh lohte paih thin anih thu leh hun tawn mil ang zela inherrema dan thar siam thin anih thu a sawi a. Chak zawka thubuai rem a nih theihna tura Sawrkar hmalaknate a sawi bawk a. Sawrkar laipui atanga Mizoramin sum a dawn dan chungchanga harsatna tawhte pawh he hunah hian sawilangin, "Sawrkar laipuiin sum min pe lo kan ti hauh lo, amaherawhchu hnathawhna tur daih a hun taka min pek thin hi kan duh dan a ni, a ti a. Union Law & Justice Minister-in ngaihpawimawha a lo dah tur thu a hrilh a ni.

He hunah hian Law & Judicial Minister Pu T.J. Lalnuntluanga chuan Sawrkar laipui hnenah Mizoram mamawh hrang hrangte a tul anga bawhzui sak turin a thlen a. Mamawh thlen zingah hian Mizoram University (MZU) a Law Master Degree zir theihna tura hmalak sak tur te, Centre of Excellence of Law & Justice dinna tura hmalakna ngaihpawimawh sak tur leh Judicial Officers' Training Academy din sak tur te, Mizoram District hrang hranga Court Building sakna tura hmalakna awm mekte ngaihpawimawh sak tur leh Mizoram tana funding system siamrem sak tura ngennate a tel a; Union Law and Justice Minister chuan rawtna kimchang thehlut tura chahin a tul anga a lo bawhzui tur thu a hrilh a ni.

Pu T.J. Lalnuntluanga hi Law & Judicial Department atangin Secretary Pi Helen Dawngliani leh Joint Secretary Pi Melody Lalrochampuii Pachuau ten an tawiawm a ni.