2336/2022-2023

Champhai, the 16th October, 2022: Govt. Champhai College (GCC) Equity and Inclusion Committee bultumin nimin October ni 15, 2022 khan College Seminar Hall-ah 'International Day of Rural Women -2022' puala hun hman a ni.

He hunah hian chaw tha leh hrisel thar chhuah leh sawngbawl dan pawimawh hrang hrangte zirho a ni a. Rannung thahna hlo hriat chian leh hman kawnga fimkhur a tul thu te, thei leh thlai, buh leh bal hlawk zawka thar duh luat avanga chin tawk nei lova rannung thahna hlo hman a hlauhawm dante tarlan a ni a. Rannung thahna hlo hman dan dik leh mihring tana a hlauawm theih dante ngaihthlak a ni.

Agriculture lama mithiamte rawn hauh lova rannung thahna hlo hman chu danin a khap thil a nih thu leh mithiamte rawn chunga hman a finthlak thu tarlan a ni bawk a. Kalkhawmte chu rannung thahna hlo hman nasat leh mithiamte rawn lova hmanin mihring, leilung, boruak leh tuiah harsatna a thlen theih dante midangte hrilhhriaa zirtir tura chah an ni.

He hun 'Rural Women Cultivating Good Food for All' tih thupui hmanga hman hi Dr. Ellie Lallianpuii, Asst. Professor, Govt. Champhai College chuan a kaihruai a. Resource Person Pu Lalventluanga, Asst. Professor, GCC hnen atangin thupui chungchang zirtirna ngaihthlak a ni a. Pi V.L. Rochhari, President, MHIP, Vengthlang North Branch-in thu a sawi bawk a. Pi Lalnunpari, Asst. Professor, GCC in lawmthu sawiin hun a khar a ni.

He ni pual hian Champhai khawpui chhunga MHIP Branch thlan bik 11 atanga member 2 zel, huan thlai tharchhuah kawnga thawhhlawk zual, an vaiin 22 te hnenah chawimawina thuziak leh lukhum pek a ni.