2335/2022-2023

Aizawl, 15.10.2022: Ni 2 awh Anthurium Festival 2022 ni hnihna chu vawiin khan Reiek Resort ah khuallian Chief Minister Pu Zoramthanga hovin hman chhunzawm a ni a. Tourism Minister Pu Robert Romawia Royte, Govt. Dy. Chief Whip Pu Lalrintluanga Sailo leh Chief Secretary Pi Renu Sharma te chu khuazahawm an ni.

Anthurium Festival atan hian Ministry of Tourism chuan cheng nuaih 25 (Festival Fund) atan tum sak niin. Kum hnih chhung Virtual mode a hman anih hnu ah Reiek Tourist Resort ah kumin hian hman leh a ni. 

Chief Minister hian kum hnih hnuah a lawm thinna hmun ngaia Anthurium Festival hun tha tak hman a ni leh thei ta chu lawmawm a tih thu a sawi a. Anthurium Festival hmang tura pantu thahnem tak an awm thin chu lawmawm tiin, a panna kawng erawh duhthu a la samloh thu a sawi a. Hmanlai ai chuan hma sawn mahse kawng a zim in, lirthei lian zawk tan a harsatna a awm thin thu sawiin, heng avang hian sawrkar chuan helai kawng hi siamthat a nih theih nan theihtawpin hma a lak tur thu a sawi. Chief Minister chuan Anthurium Festival neihna hmun pawh hi tun dinhmun aia a changtlun zawk nan hma lak a nih tur thu a sawi bawk.

Khuallian chuan anthurium pangpar chu ram dang atanga Mizorama lakluh, hlawhtling taka kan tharchhuah ve tak, a hming chawia festival pawh nei thei hial khawpa a tam tham a kan thar leh hralhchhuah a ni chu lawmawm a tih thu a sawi a. Chutiang chuan kan ram leilung hi thil tam tak tharchhauh nan a that thu leh economy hmasawnna atan a hlu tak a nih thu a sawi.

Chief Minister chuan tourism chu Mizoramin pawisa a lakluh tam theihna a ni a ti a. Delhi leh khawpui lian tak takah chuan boruak thianghlimlo avangin an hriselna thlengin nghawng thalo a awm phah thei a. Mizoramah erawh a thlawn in boruak thianghlim tak hip tur kan nei te hi kan vanneihna a ni, a ti a. Heng kan ram nawmna te hi khualzin hip na atan, sum lakluh nan hman a nih theih dan te, chumi atan chuan ruahmanna hrang hrang siam a, sum chungchangah pawh financial institution lian tak takte dawrin a tul anga bawhzui zel a nih tur a sawi. Chief Minister chuan festival kharna ni pah fawmin Zoram malsawmna pek hi haichhuak a hmasawnna leh hausakna a chhuah turin mipui tawiawmna a sawm a ni.

Khualzahawm Tourism Minister Pu Robert Romawia Royte chuanin tourism hmasawnna atana sawrkar in nasa taka hma a lak dan a sawiin, chung zingah chuan department in hmalakna eng 'Infrastruture Revolution' chu Reiek leh Ailawng tlangdung ah a kalpui mek tur thu a sawi a. Hmachhawp siam zingah PRASAD scheme (Pilgrimage Rejuvenation And Spiritual Augmentation Drive) hnuaia project dah a nih thu te, hmun dangah pawh project dang hrang hrang siam a nih thu te a sawi bawk. Tourism Department hi mipui leh private entrepreneur-te nena hmalak ho a tul zia sawiin, Tourism Sector leh Tourism Industry thang zel tur chuan mitin in pek na a tul zia a sawi bawk. Tourism Minister hian November thla laihawl a International event Mizoram in a thlen tur thu sawiin, International Tourism Mart atana Working Committee hrang hrangte din a nih tawh thu a sawi a. November ni 17 ah a ruala guitar tum tam ber record siam tum, Largest Acoustic Guitar Play Ensemble ah tingtang perh thei chu a tam thei ang ber tel turin mipui a sawm bawk.

Khualzahawm Govt. Dy. Chief Whip Pu Lalrintluanga Sailo, Dampa bialtu MLA ni bawk chuan thu sawiin, Anthurium Festival a hlawhtlin theihna tura inpuahchahna leh hlawhtlinna chu lawmawm a ti a. Kum dang festival a harsatna kan tawh thin kal Kawng leh Tui lakna harsatna tam tak awm thin pawh theih tawpa chhawmdawl hna thawh mek zel anih thu sawiin, Reiek panna kawnga lei pawimawh tak tur Tlawng lui a dawh hna thawh mek pawh zawh thuai a nih nan leh kawng siamthat hna pawh thawk tura sawrkarin hma a lak thu a sawi a. Chhimtuten hun hlimawm tak an hman a beisei thu a sawi a ni.

Khualzahawm Chief Secretary Pi Renu Sharma chuan thu sawi bawkin, Mizoram chu tourism lama hmasawn belh zel theihna a neih thu a sawi a. Khualzin tam zawk hip tura hma kan laknaah hian "responsible tourism" chu rilru kan kan dah len a pawimawh thu a sawi a. Mizoramin mi a hip tam theih ber chu thil siam belh chawp ai chuan a ramchhunga thil awm sa, a ram nawmna a nih avangin heng a mawina leh hlutna te hi tourism hmasawnna in a tihchhiat loh nan kan zavaiin fimkhur tlan a pawimawh thu a sawi.

Anthurium Festival ni hnihna hi session hnih a then in, session hnuhnung zawkah hian Mizo hnamzia phochhuahna - hnam lam, zaithiam/band leh fashion show te bakah intihlimna chi hrang hrang entir a ni a. Chhimtu mipuite tan Mizo Handloom & Handicrafts exhibition, Mizo eisiam chi hrang hrang, Zokhua, Adventure activities - ziplining, climbing, Tent accomodation, Forest Bathing, Star Gazing, Anthurium Varietal Display & Sale leh intihhlimna dangte chhawp chhuah a ni bawk.

Pu BB Swain, Secretary MSME Ministry, Govt.of India chu he hun hmang hian a lo kal bawk.