2334/2022-2023 

Aizawl, 15^th October, 2022 : Ministry of Micro, Small and Medium Enterprises (MSME), Government of India buatsaihin vawiin khan Dawrpui Multipurpose Centre-ah Mega National SC-ST Hub Conclave neih a ni a. He conclave hi Commerce & Industries Minister Dr R. Lalthangliana chuan khuallian niin a hawng a, he hunah hian Chief Information Commissioner Pu Lalnunmawia Chuango, Commerce & Industries Principal Secretary Pi Esther Lalruatkimi leh Commerce & Industries official ten tel puiin, Ministry lam atangin MSME Secretary B.B. Swain. Joint Secretary Mercy Epao leh official pawimawh thahnem tak an rawn tel bawk a, Mizorama MSME entrpreneurs thahnem tak an tel bawk a ni.

Khuallian Dr R. Lalthangliana chuan Ministry of Micro, Small and Medium Enterprises (MSME) in Mizoram mamawh tak MSME tih hmasawna, tih changtlunna tur inkawmhona an rawn buatsaih chu lawmawm a tih thu a sawi a, MSME hnuaia branch hrang hrangte chu Mizoramin an mamawh nasat te an nih avangin DIC, MSME-DFO, KVIC, NSIC etc. te chu mipuiten awlsam taka an ban zung zung theih nan Mizoramah office building pakhatah awm khawm thei se tih chu a duhthusam a nih thu leh Ministry lamin a sakna tur sum an pek theih dawn chuan office bulding leh staff quarters sakna tur hmun Mizoram sawrkarin a ngaihtuah theih tur thu a sawi. Mizoram hmun tam zawk chu tlangram vek a nih thu sawiin Industry lian tak tak din a rem lova,  MSME chhinchhiah danin Mizorama Industry ding zinga  97.36% chu Industry tenau (Micro Enterprises) an ni a, chung zinga a tam ber chu cheng nuai 10 tling lo senga bul tan an ni a, an zinga a chanve (50%) vel phei chuan loan la lovin anmahni sum khawl atangin bul an tan a ni, a ti a. Bul tan tura loan lak kawngah leh thil hrang hrangah kaihhruai kan la ngai hle tih sawiin Ministry lam atangin theihtawp chhuahpui tur leh an inkaihhruaina hman laite pawh Mizoram leh India hmarchhak state te tan tlema thlahdul hlek a tul a a hriat thu sawiin, Bank ho pawh loan pekchhuah kawngah in hawng zauva, loan dilte pawh rang taka tihchhuah kawngah tan la thar leh tura a duh thu a sawi a ni. 

Dr Thangtea chuan COVID-19 hripui lengin Mizoram na taka a nghawng thu sawiin mi tam takin eizawnna an chan a, tun thlengin hripui len hma ang kha pha tawh lovin harsatna an tawk a, anni ho khaichhuah leh nan chuan Micro, Small and Medium Enterprises hi a pawimawh takzet tih sawiin Ministry pawhin ngai pawimawh a theihtawp chhuaha hma laksak turin a ngen a, Mizorama DIC kan neihte pawh thuam chak thar leh turin a ngen bawk a ni. 

Khuallian chuan Micro, Small and Medium Enterprises  Ministry in Mizoram tana hma a lo lak tawhna te tarlangin lawmthu a sawi a, Luangmuala leh Lengte-a ruahtui dahkhawlna tur sak nana cheng vaibelchhe 9.72 a rawn pek chu tluang taka thawh mek a nih thu sawiin zawhfel tur hun bituk aia hma in an zo thei dawna a hriat thu a sawi bawk. Heng bakah hian Flatted Factory Complex pali - IGC Luangmual (Rs 9.98cr), Industrial Estate Kolasib (Rs 14.99cr), IIDC Pukpui, Lunglei (Rs 9.98cr) leh IIDC Zote, Champhai (Rs 9.93cr) te chu MSME Ministry in an ngaihtuah mek thu sawiin, Union Minister of MSME Pu Narayan Rane pawhin an pawm hunah Mizoram rawn kal a lungphum rawn phum a duh thu a sawi nghe nghe tih a tarlang bawk. 

National SC-ST Hub hi kum 2016 khan prime Minister Narendra Modi chuan a hawng a, a programme in a tum ber chu India rama Scheduled Caste leh Scheduled Tribe zinga mahni kutkawiha eizawnna ngelnghet nei duhte bul tanna tur atana kawng sial sak leh tanpui a ni a, hetiang lama tui leh ngaihven duh tan MSME website https://msme.gov.in/ ah lutin a zirchian theih reng a ni.

He Conclave ah hian Technical session pahnih awmin a hmasa zawkah Central Public Sector Enterprises leh Bank aiawh mithiam ten zirtirna pe in inkawmhona hun tha tak  neih a ni a. a hnuhnung zawkah Government e Marketplace (GeM) leh Rural Self Employment chungchang mithiamten zirtirna an pe bawk a ni.