Vawiin khan Government Mizoram Law College(GMLC) Legal Chamber-ah Law & Judicial Minister Pu Lalsawta chuan Mizoram State Legal Services Authority(MSLSA) leh GMLC tangkawpin an buatsaih, Zonal Seminar on " Legal Services to Victims of Drug Abuse and Eradication of Drug Menace" chu a hawng.

Vawiin a Law College  a Zonal Seminar hawngtu Law Minister Pu Lalsawta chuan ruihlo vanga harsatna chu Mizoramah chhungkaw tamtakin a takin an tuar a. Thalai tam tak a hun lovah ruihlo vangin an thi a, ruihlo vanga retheihna leh harsatna Mizoramin a tawh te chu a nasa a. "Ruihhlo avanga kawng tinrenga kan channa hi chhiarkawp hmanga chhut ngawt theih pawh ni tawh lovin a nasa a ni", a ti.

Seminar chuan rahtha chhuah se a duh tih sawiin ruihlo ngaih avanga dan thila harsatna tawkte tanpuina kawng te dap ni se.  Mizoram chhunga Ruihlo avanga harsatna tam tak awm mekte tih tawp dan kawng te ngaihtuah chhuah ni se a lawmawm hle ang a ti a.  CYMA hmalakna sawiin anni aia thawk nasa an awmlo a ti a. YMA te pawh a chang chuan ruihlo do kawngah an beidawng teuh thin hle a. Ruihlo tawlhtu te hremkawngah an chan a chhiat thin avanga an beidawnna te pawh a awm a. Court in hrem phu te a hrem theih nan he seminar hian ruahmanna tha zawk a rawn chhawpchhuah ngei a beiseiawm a ni a ti.

Thusawitu dang, Justice Michael Zothankhuma, Gauhati High Court Judge chuan Ruihlo avangin khawvel ram zawng zawng deuh thaw in harsatna lian tak tak an tawk deuh vek tih a sawi a. Ruihlo do hna chu tangruala thawh chi a ni a ti a. Pawl pakhat chauhin a do a midangin an thlir mai mai chuan hneh chi a ni lo a  - sawrkar, mipui, pawl hrang hrang, NGO te leh mimal anga tanrual vekna tur thil a ni a ti.

Ruihlo chungchanga hrem tawkte hremna case thlir let in ruihlo tam tham mansak vang a ni lo vek a. A awmzia chu, ruihlo tawlhtu tak tak, sumdawnna liantham tak atana hmang te chu man leh hrem an la ni lo a ni a ti. Ruihlo do kawngah dan chu mahni kuta dah lovin thuneitute kuta hlan chhawn tha atih thu a sawi rualin Enforcement Agency te tan lak a ngai nasa tih a sawi a. Enforcement Agencies te lam atanga a rawn chian loh chuan Court lamah hrem phu hliah hliah te pawh hrem theih in an awm lo palh thei a ni a ti.

Zonal Seminar Inaugural Programme hi Pu Vanlalenmawia, Member Secretary, MSLSA in a kaihruai GMLC Principal Dr.Rualkhuma'n lawmthu sawiin programme a khar a ni. Seminar hi Session 6 ah then a ni a. Thupui hrang hrang - Problem of Drug abuse in India with particular reference to North East India & Mizoram, Drug abuse : The legal framework, Prevention, control and eradication of drug abuse or menace leh Rehabilitation of Victims of Drug abuse; their re -integration into society ah te mithiam ten zirtir an pe a. Haryana, Punjab, Manipur, Nagaland, Assam, Maharashtra, GMLC zirlaite leh hmun dang atang te in seminar hi an rawn chhim a. Chawhnu programmeah hianJustice Ujjal Bhuyan, Judge, Gauhati High Court pawh a rawn tel tura beisei a ni.