Thingkaha Lawngtlai District Institute of Education and Training (DIET) building thar chu nimin khan School Education Minister Pu H. Rohluna'n a hawng.

Pu H. Rohluna chuan Lawngtlai DIET building thar hawn theih a ni ta chu lawmawm a tih thu sawiin, uluk taka enkawl chho turin staff leh zirlaite a chah a. Zirna chu eng kima hma sawnna bul a ni a, hnam din chhuah nan pawh zirnaa bul tan a ngai a, ngaihthah thiang a ni lo tiin, sawrkar pawhin zirna a ngaih pawimawh avangin zirtirtute zir leh chhawnna tur DIET building thar pawh district parukah hawn theiha sak peih tawh a ni, a ti a. Trainee-te chu building tharah rilru thar pu a, an thil zirte uluk taka vawng a, a hun takah tha taka hmang chhuak thei turin inthlahdah lova zir turin a fuih.

Khual zahawm, School Education Department Commissioner & Secretary Pi Esther Lal Ruatkimi IRS pawhin nakina miin kan chanchin an la sawi tur chu tunah kan ziak mek tih sawiin, thawnthu ngaihnawm tak, mite zir tlak hnutchhiah turin kan nun kan uluk a, fimkhur taka hun kan hman a pawimawh a ni, a ti.

DIET Lawngtlai building thar lawmna inkhawm hi building thar classroom-ah hman a ni a. SCERT Director Pi Laldawngliani Chawngthu chuan inlawmna thu a sawi a. A building satu PWD Project Sub-Division Lawngtlaia SDO Er Samuel Lalnunpuia'n technical report a pe a. DIET trainee-te hnen atangin special item hmuhnawm leh ngaihnawm tak takte en leh ngaihthlak niin, DIET Lawngtlai Principal Pi Ngur Hming Liani Chinzah chuan lawm thu sawiin hun a khar a ni.

DIET Lawngtlai hi kum 2005-2006 session khan District Resource Centre/Mini-DIET angin din a ni a. Kum 2012 atang khan DIET puitlinga hlan kai a ni. A building thar hi Rs nuai 225 sengin, hmun square metre 890.23 awhin RCC structure chhawng 3-a sak a ni a. Room hrang hrang 11, lobby 2 leh toilet 10 a awm a. Ni 20.10.2015-a sak tan niin, ni 10.11.2017 khan sak zawh a ni.

Building thar hawnnaah hian Minister hi a nupui Pi Lalbiaknii leh Education Department-a officer pawimawhte'n an tawiawm a. He hunah hian LADC CEM Pu T. Zakunga, Lawngtlai Bawrhsap Pu N. Chakhai MCS, LADC-a member-te, sawrkar official-te leh mipui eng emaw zat an tel bawk.