No.6675/2020-2021

Dated Champhai, the 26th November,2020: Law & Judicial Minister Pu T.J. Lalnuntluanga, Champhai South bialtu MLA ni bawk chuan vawiin chawhnu khan a bial chhunga inkalpawhna kawngpui siam mekte a enfiah. Minister hi Er.H.Lalzirliana, MLA & Vice Chairman, Road & Infrastructure Development Board chuan a tawiawm a ni.

Law & Judicial Minister hian MLA Fund Rs 26,10,000/- hmanga chei that Kelkang leh Dilkawn inkalpawhna kawng, Kilometre 2  a  thui, a zau zawng metre 8.5 bawr vel leh metre 8 vel white topping tih tura ruahman chu line department  hotute leh khawtlang hruaitute nen a hmunah kalin an enfiah. Pu T.J. Lalnuntluanga chuan khaw kar kawng inkalpawhna tha tak a awm theihna tura khawtlang hruaitute leh ram neitu te'n rilru zau tak pu chunga hmalakna an tawiawm avangin an chungah lawmthu a sawi a. Khawtlang tangruala kawng tha tak siam ani chuan thawhhona tha tak a awm zia a lantir ani tiin, Kelkang leh Dilkawn khawtlang  chungah MLA Fund hmanga kawng laih beisei let nei miah lova an tawiawm avangin lawmthu a sawi a. Kawng laih zauh mai bakah cheibawl zelna turah  BADP leh kawng enkawltu  PWD atang pawhin theihtawp chhuah zel tum a ni, a ti bawk.

Minister tawiawmtu Er.H.Lalzirliana, MLA & Vice Chairman, Road & Infrastructure Development Board chuan khaw kar  kawng tha tak nei tura khawtlang mipuite inpekna fakin, Sawrkar kutah chauh innghat lova mahni theihna chenah tanlak angaih thu a sawi a. Kawng tha nei turin Sawrkarin theihtawp a chhuah chhunzawm zel dawn a ni, a ti bawk.

Hemi hnu hian Champhai Town Planning kalpui mek hnuaia hmalakna pawimawh hmasa leh langsar tak, Champhai khawpui vetchhuaka inkalpawhna kawngpui ‘Ring/Circular Road’ sial meka hmalakna hmasa  Champhai Zotlang leh Tlangsam khaw kar kawng  kilometre 4.5 a thui hnathawh mek  chu Official-te leh khawtlang hruaitute nen  an enfiah nghal bawk a ni. Kawngpui laihzau hna hi kumin March thla laihawl atanga tan niin, White topping tih leh vek tur a ni ang.

Pu T.J. Lalnuntluanga chuan khawvel changkang zelah khawpuite a thang lianin a pui deuh deuha, khawpui tawt tiziaawma inkalpawhna kawng tha zawk neih theihna turin hmathlir thui tak neia Champhai Town Planning duan anih thu a sawi a. Nakin lawka harsatna awm theite thlirin a remchan lai tun huna hmalak a tul thu a sawi a. UD&PA Department Official-te pawh hnathawh mekte anihna ang taka thawh anih theihna turin uluk taka vil turin a chah a ni.

Pu T.J. Lalnuntluanga chuan vawiin tlai khan Zotlang Truck Terminal siam mek a tlawh nghal bawk a ni.

Kawng leh Truck Terminal  siam endikna hunah hian Minister hi Pu Lalzorama SE, P&E Champhai, Vanlalchhuanliana DUDO & SO Champhai, Pu Eddie C.Zothansanga EE, PWD Champhai, Dr.Lallawmkima DIPRO Champhai, PWD engineer-te leh khawtlang hruaitu te’n an tawiawm a ni.