No.3211/2020-2020

Dated Champhai, the 18th July,2020 (Saturday): Minister of State for Law & Judicial, Parliamentary Affairs, Transport & EF&CC Department, Pu T.J. Lalnuntluanga chuan vawiin khan a bial Champhai South fang chhunzawm zelin, tunhnai HSSLC leh HSLC Compartmental exam result puan taka hlawhtlinna changte fuihna leh lawmpuina thilpek hlanna a nei.

Pu T.J. Lalnuntluanga chuan kum hmasa lamahte In tin tlawhchhuaka Zirlai hlawhtlinna changte lawmpuina hlan thin anih thu sawiin, lawmpuina thilpek lian tham tak pe thei lo mahse a thil tih chu thinlung taka lawmpui leh duhsak lantirna a ni tiin, lawmte lawmpuina thinlung chu a phena thil awm pawimawh zawk anih thu a sawi a. Fuihna leh thilpek hlanna neih  chuan Zirlaiteah phurna a pek ngei a beisei thu sawiin, Zirlaite chu tum mumal  tak neia, eizawnna ngelnghet leh dik, mahni atanga intan intodelhna, chhungkua, khawtlang leh ram thlenga siam a tul thu leh chu chuan ram sum leh pai dinhmun nasa taka a siam that theih dawn thu a sawi a. Midangte leh khawtlang tana innghah ngamna leh midangte tana malsawmna thlentu nih tum tura fuihin, zirna leh zel tura taima zuite chauh hlawhtlinna tak tak changtute an ni, a ti a. Remchang hmasa berah Zirlaite kawng kawhhmuhna Career Guidance changtlung tak neih tum a hmalak anih dawn thu a sawi bawk.

Champhai South bialtu MLA chuan hlawhtlinna tak tak chang tur chuan beidawng mai lova tih hram hramna nun neih a pawimawh thu tarlangin, HSLC  leh HSSLC examination a ti tha chiahlote tan pawh hmalam hun  thlira, hlawhtlinna tlanga ding thei tura hun kal tawh hnuchhawna thahnemngai taka bei chhunzawm zel thin turin a chah a. Ram siam thatna turin ngaihtuahna dik neih a pawimawh thu pawh sawiin, ram leh hnam damna turin sum leh pai ringawt ngaihsak lova hnungchhawn ngam a hun tawh a ni, a ti a. Zirna kawnga harsatna neite tan tanpui thei turin engtiklai pawha a inhuam thu sawiin, Zirlaite chu veng, khawtlang leh ram tan enge ka thawh ve theih ang tih ngaihtuah fo thin turin a fuih a. Zirlai hlawhtlinna changte thinlung taka a lawmpui thu sawiin, an kalzelna turah theihtawp chhuaha taimakna leh tumruhna nei tura fuihin duhsakna a hlan nghal a ni.

Law & Judicial Minister  hian  Champhai South Higher Secondary School, Electric Veng a mi chu tlawhin Board Member-te leh Zirtirtute meeting a neihpui a. Result neih vawikhatnaah result tha tak  Champhai South Higher Secondary School in a nei thei chu lawmpuiawm tiin, thawktute leh Zirlaite thawhrimna fakawm a tih thu a sawi a. Champhai South Higher Secondary School  hian tunhnai HSSLC result chhuakah khan  pass percentage 82.14% a nei a ni.

Pu T.J. Lalnuntluanga  chuan vawiin hian Zirlai hlawhtlinna chang Electric Vengah 21, Zion Vengah 13,  Venglaiah 24, Bethel Vengah 43 Vengtharah 16, Tlangsamah 19 leh  New Champhaiah 10, an vaiin mi 146 te hnenah lawmpuina thilpek Zirlaite puitu Dictionary a hlan a ni.