Dated Champhai, the 18th July, 2020 (Saturday): Nizan dar 10.05 a  5.01 Magnitude a na lirnghing   avangin  Champhai District Tuipuiral khaw hrang hrangah chhiatna a thleng leh nual a, chhungkaw tam tak mahni in ah riak ngam lovin an awm phah bawk a ni. Lirnghing avanga harsatna leh tawrhnate  tlawha ngaihven turin tukin  khan Champhai DC Pi Maria C.T Zuali hovin District Disaster Management Team Emergency Meeting neih  a ni a,  Tuipuiral khaw hrang hrangte chu team hrang hranga insemin tlawh kual nghal a ni.

Champhai District Disaster Management Team te hi Team hrang hrang 7 ah insiamin a hnuaia mi ang hian khaw 27 an tlawh kual a ni.

Team 1 – Pi Maria C.T Zuali, DC Champhaiin Buang, Khuangleng, Leithum leh Dungtlang khuate a tlawh a.

Team 2 – Pu R.Lalnghakliana, PD DRDA in Vanzau, Bungzung leh Zawngtetui khuate a tlawh a.

Team 3 – Pu Vanlalchhuanliana, DUDO/SO in Khawbung, Zawlsei leh Khuangthing khuate a tlawh a.

Team 4 – Pu Benjamin Zalawma Ralte, BDO Khawbungin Samthang, Vaphai, Saikhumphai leh Farkawn khuate a tlawh a.

Team 5 – Pu Obed Lalmalsawma SDC in E. Chawngtui,  Khankawn, Thekpui leh Thekte khuate a tlawh a.

Team 6 – Pi Esther Leihang, SDC in Sazep leh Vangchhia khuate a tlawh a.

Team 7 – Pi R.Lalnunkimi, DTO/BDO Champhai in Lianpui, Sesih, Leisenzo, Hruaikawn, Bulfekzawl, Melbuk leh Zokhawthar khuate a tlawh bawk.

District Disaster Management Team te hian khaw hrang hrang an tlawhahte hian Solar light, First Aid Kit, tui thianghlim in tur leh sum fai tanpuina an pe nghal zel a ni.

Champhai DC kaihhruainain lirnghing tuarte chhawmdawl leh tanpuina kawngah hmalakna hrang hrang neih tawh a ni a. Mahni in a riak ngam lo te riah lailawkna tur riahbuk (Temporary Shelter) sak nan khaw 8 te chu mau trip engemawzat pek an ni tawh a, tunah hian khaw dang mamawhna hmunah pawh a tul ang zela pek theih tura ruahmanna kalpui mek a ni. Temporary Shelter-ah hian inthiarna leh eirawngbawlna turte ruahman anih bakah Electric eng dah tel vek theih tura  siam a ni a. Hei bakah hian tui dahkhawlna tur Sintex, silpouline leh sumfaiin tanpuina hi pek an ni bawk.

Tun hnai  lirnghing avanga Champhai District khaw hrang hranga chhiatna tawkte hnenah hian Disaster Management & Rehabilitation atangin tanpuina engemawzah sem chhuah tawh a ni a, report hi a khat tawka a luh belh zel bakah lirnghing leh ruahsur vanga leiminte a awm zel avangin tanpuina hi la sem belh zel tur a ni.

Champhai DC kaihhruaina hnuaiah Champhai District mipuite khuarel chhiatna mai bakah mihring siam chawp chhiatna thleng thin laka an  him tlan theihna turin District Infrastructure Quality Control Body (DIQCB) chu din tum a ni a. Insak, lungrem leh Village Internal Road hnathawk turte chuan DIQCB ah hian an hriattir hmasak zel a ngai dawn a ni. District Infrastructure Quality Control Body (DIQCB) ah hian Deputy Commissioner chu Chairman  niin, Member-ah thiamna bik nei Geologist, Engineer leh Architect te an tel dawn a ni.