No.1175/2020-2020

Minister of State for Law, Transport & Forest department Pu TJ Lalnuntluanga chuan vawiin khan a bial, Champhai South chhunga HSLC exama hlawhtlinna changte lawmpuina a hlan.

Law Minister leh Champhai South bialtu MLA Pu TJ Lalnuntluanga chuan Zirlai hlawhtlinna changte thinlung taka a lawmpui thu sawiin, an kal zelna turah taima taka zir chhunzawm turin a fuih a. Tuna beisei anga pass ta chiah lo te pawh insit mai lova thahnemngai leh zuala tan la sauh sauh turin a fuih a. Zirlaite chu nakin lawka ram leh hnam innghahna tur an ni tih inhria a, rilru nei ran chungin taima leh rinawm taka lehkha zir turin a chah a ni.

Pu TJ Lalnuntluanga hian tukin khan Aizawl chhuahsanin Champhai a rawn pana, Tuipui khuaa HSLC pass tharte lawmpuina thilpek Dictionary bu a rawn hlan nghal a. Hemi hnu hian Chhungte, Jail Veng, Kanan Veng leh Dinthar Veng te rawn tlawh lehin HSLC examination pass tharte lawmpuina thilpek a rawn hlan nghal. Zirna kawnga hlawhtlinna chang tharte hi an chenna inah kala mimal tinte lawmpuina chibai buk paha thilpek hi hlan vek duh viau mahse tunlai Covid-19 hrileng mek avangin a thulh a. Lawmpuina thilpek te hi zirlai thenkhat leh hruaitute kutah hlanin an lo pe chhawng zel dawn a ni.

Law Minister hian naktuk leh naktip hian a bial chhung zirlai hlawhtlinna changte lawmpuina a hlan chhunzawm dawn bakah ramri Tiau kama duty te tlawhin an mamawh angte a pe dawn a ni.