No.1176/2020-2020

Vawiin khan Lawngtlai BNRGSK Hall-ah Officer-in-Charge Vehicle Movement Pu Lalremruata Sailo hovin police lam te, supply lam te, mipui mamawh bungraw phurtu te, dawrkai te leh veng hrang hranga VLTF te chu ni tin mamawh bungraw phur khuahkhirh dan chungchangah an inrawn khawm.

He hunah hian inkharkhip avanga ni tin mamawhah harsatna a thlen loh nana chuti ang phur lirtheite felfai taka an chet vel theih dan tur sawi ho niin, District chhung himna tiderthawng lo tura sawrkar ruahmanna te tha taka kalpui a nih theih dan tur sawi ho a ni a. Officer-in-charge, police, supply, dawrkai, truck driver association leh VLTF te atanga an hna thawh dan leh harsatna te ngaihthlak a nih hnuin, inhre pawh tlang tak leh fimkhur tak chung siin thil kalpui ni se, tih a ni a. VLTF-te chuan ni tin mamawh phurtu driver leh handyman te chu an theih tawpa an duat a, an ngaihsak thin thu an sawi.

He hunah hian state pawna bungraw laknaah driver leh handyman ni lo dawr neitu emaw, mi dang emaw an kal ve a rem loh thu te, mi dang lo phurh luh emaw, bungraw hlan thlak hnua bungraw dang emaw, passenger emaw phurh chhuah emaw pawh phal a nih loh thu te tar lan niin, chuti ang laka fihlim tur chuan inchah thar a ni a. Sawrkar thu chhuak angin, state pawn atanga bungraw lo phur luttute chuan a rang thei ang bera an thil phurh an hlan thlak hnuah khawpui chhuahsan nghal tur a ni a, khaw chhungah riah a rem lo a ni. State dang atanga bungraw rawn phur luttute chu bungraw hlan thlak hma leh hnua khawpui chhunga an din rei lutuk loh nan dawr neitute leh an bungraw phurtute chu inbe pawp thain, sawrkar ruahmanna zawm tha se, tih a ni.

Lawngtlai District-a ni tin mamawh phur lut leh chhuak hi Thingkah check point-ah lo chhinchhiah zel a ni a. Lirthei veivak hi vil reng a ni.

Attachment

  • Loading attachment...