No.3176/2020-2020

Dated Champhai, the 17th July, 2020: Minister of State for Law & Judicial, Parliamentary Affairs, Transport & EF&CC Department, Pu T.J. Lalnuntluanga chuan vawiin khan a bial Champhai South chhunga HSSLC & HSLC Compartmental exam result puan taka hlawhtlinna changte lawmpuina thilpek a hlan.

Law & Judicial Minister, Champhai South bialtu MLA ni bawk, Pu T.J. Lalnuntluanga chuan Zirlai hlawhtlinna changte thinlung taka a lawmpui thu sawiin, an kal zelna turah duhsakna a hlan a, taima taka an zirlaite zir chhunzawm zel turin a fuih a. Minister chuan zirlai hlawhtlinna chang tharte chu kum kalta a a lo tih tawh angin an chenna in ngeia kal a chibai buk a duh laiin, tunlai hrileng avanga in lama inkal chilh a rem ta lo chu pawi a tih thu a sawi a. Zirlaite chu nakin lawka ram leh hnam kaihruaitu leh innghahna tur an ni tih inhria a, taima leh rinawm taka lehkha zir turin a chah a ni.

Pu T.J. Lalnuntluanga hian tukin khan Aizawl chhuahsanin Champhai a rawn pana, Tuipui khuaa zirlai pass tharte lawmpuina thilpek a hlan hnu hian Chhungte, Jail Veng, Kanan Veng leh Dinthar Vengte rawn tlawh lehin zirlai hlawhtlingte lawmpuina thilpek a hlana, vawiina zirlai hlawhtling lawmpuina thilpek a pekte hi mi 36 an ni.

Law Minister chuan Tuipui khuaah hian Khawzawl BDO Dr. Saithangpuia hruaiin Community-cum-Boxing Hall sak dan tur a enpui a. Minister ruahmanna angin naktuk hian Engineer te’n Hall sak dan tur hi a hmunah an enfiah nghal dawn a ni. Pu T.J. Lalnuntluanga hian naktuk leh kar leh Thawhtanni hian a bial chhung zirlai hlawhtlinna changte lawmpuina a hlan chhunzawm ang a, Thawhlehni zingkarah Ruantlang-Mualkawi kawng hlui siam dan tur enin, tukthuan eikhamah Aizawl a pan leh dawn a ni.