No.3177/2020-2020

Vawiin khan Lunglei DC Conference Hall-ah Lunglei Bawrhsap Pu V Lalsangliana, IAS kaihhruaiin Covid-19 hrileng avanga state pawn atanga Lunglei District mi leh sa lo haw te khunghranna 'Community Quarantine Center' atana an hmunhma hman tir tute chunga lawmthu sawina hun hman a ni.

He hunah hian Lunglei SP Pu Stephen Lalrinawma, CMO Dr Thani Pachuau, Addl DC Pu R. Vanrengpuia leh kaihhnawih sawrkar official-te bakah community quarantine center neihna veng VLTF-te leh kohhran hruaitute an tel a ni.

Lunglei DC Pu V. Lalsangliana chuan COVID-19 hrileng avangin state pawn atangin Lunglei District mi leh sa thahnem tak an lo haw thu sawiin, tangkhang rawn haw runpui laiin sawrkar hmunhma neih te’n a dawl zawh meuh loh avangin May thla khan Kohhranhote puihna leh tawiawmna an ngen thu a sawi a. Sawrkar ngenna Kohhran te’n inphal taka lo chhangin Lunglei khawpui chhunga veng 12-ah kohhran hmunhma ‘Community Quarantine Centre’ 21 zet din anih tak thu leh heng CQC-ah te hian tangkhang lo haw mi 216 te tluang taka quarantine an nih thu a sawi a. An hmunhmate phal taka hman hawhtira mipuite tan bang lova tawngtai saktu Kohhranhote chungah lawmthu sawiin hun lo kal zel turah pawh thawhho leh hmalak puiah a sawm a. Covid-19 hripui leng chu khawvel ram hrang hrang te’n an mangan pui laiin Mizoramah chuan mi tlawmngai leh thawh hreh neilo VLTF-te kan nei hi kan vannei takzet a ni tiin an inpekna leh thawhrimna avangin an chungah lawmthu a sawi a. Hripui do letna kawnga Medical team, official leh security-te inpekna leh thahnemngaihna chu fakawm a tih thu a sawi bawk.

Vawiin inkhawm ah hian official-te Kohhran, VLTF-te atangin thusawina ngaihthlak niin Kohhran leh VLTF-te hnenah Certificate leh lawmthu sawina lehkha an hlan bawk a ni.