Vawiin nileng khan Circuit House, Lawngtlai-ah Lawngtlai Academy of Letters-cum-Seminar on ‘Chhiatni thatni inrelbawl dan’ neih a ni a. Lawngtlai DC Pu B. Lalhmingthanga’n khuallian niin a hmanpui.

LAL Rising Day cum seminar hi Dr. Vanlalringa Bawitlung in a kaihruai a, Pu K. Hrekung, President LAL in welcome address sawiin Pu V. Saingura, Secy. LAL in report a pe a ni. He hunah hian Pu B. Lalhleia buatsaih ‘Chhiatnia kan in sawngbawl dan thlir zauna’ chu ngaihthlaka sawiho a  ni bawk.

LAL Rising Day lawmna ah hian LAL Award 2011 chu Dr. R. Tintlunga Hnialum hnenah hlan a ni a. He award hi Literature lama a thawh that vanga pek niin Certificate leh Rs. 5000/- a keng tel a ni.

Lawngtlai DC Pu B. Lalhmingthanga chuan thuziak hi literature tinungtu pawimawh tak a ni a ti a. Literature hi a hlu em em a, hnam fing apiangin an ngaihlu thiamin an roh a ni a ti. Kum 2010 a Mizo Academy of Letters in lehkhabu tha berah Lawngtlai Academy of Letters Vice President Pu Samson V. Thanruma kutchhuak ‘Beiseina Mittui’ chu an thlang a. Lawngtlaia lehkhabu ziaktuten hmun hrang hrangah hriat an hlawh tih sawiin lehkhabu tam tak phei chu research atan pawh an hmang tangkai hle a ni a ti a. LAL hmalakna avangin LADC in lehkhabu ziaktuten tanpui nan publication board mumal tak a nei a, lehkhabu ziaktuten hmang tangkai se a duh tih a sawi. LAL in award an siam chu tha a tih thu sawiin Lawngtlai district chhunga literatute lama hmasawnna a thlen ngei a beisei tih sawiin LAL chu a kalzelna turah duhsakna a hlan a ni. DC hian LAL hnenah hian tanpui nan Rs. 10,000/- a pe bawk.

LAL Rising Day lawmna pual hian chham hla chhiar chhuahna hun hman a ni a, hetiang lama tuimi ten an irawm chhuak hla te an chhiarchhuak a, sawihona hun an hmang nghal bawk.