Chief Minister Pu Lal Thanhawla chuan ‘ Keini Mizote, hnam tlemte zingah hian tan hona a that phawt chuan rilru lama harsatna neite enkawl chungchangah nasa takin hma kan sawn thei a ni’ a ti. He thu hi Volunteers for Community Mental Health (VOLCOMH) in Vanapa Halla World Mental Health Day 2011 vawi-19-na vawiina an buatsaiha a sawi a ni.

Chief Minister chuan VOLCOMH in World Mental Day an buatsai hi thil pawimawh tak, a hman tan tel ve ngeina chi a ni tiin, tel tura an sawmnaah lawmthu a sawi a. Khawvel ram dang ruala Mizoramah pawh he ni hi rilru lama harsatna neite tan kum 1993 a Pu J. Lalsangzuala (L) te nen an lo hman tawh thu a sawi a.Ram changkangah chuan rilru hriselna an ngaihpawimawh avangin sum lamah pawh an seng tam thin a ni Pu Hawla chuan a ti a. Keini ram thanglai ah chuan duh anga sum hman tur a tam theih loh avang leh awareness lam a chak tawk loh avangte in rilru lam natna enkawlna kawngah ke kan pen chak theilo a ni a ti a. Hetih laia VOLCOMH in hetiang lama hma a la hi a fakawm a, district dangah te pawh hmala tura chahin, sorkar ang pawhin district hotute chu hriattir theih an ni a ti.

Mizote hi kan hnam ala naupan ang bawkin, rilru lama harsatna neite enkawlna leh chhawmdawlna kawngah kan la hniam hle a, a tulna leh pawimawhna kan hre ve tan dawn chauh a ni Chief Minister chuan a ti a. Kan pipu te hunah chuan ramhuai zawl kan tih loh leh kawchhunga khawhring lut te kan ti thin a ni tiin, tunhnu thleng pawhin kutkawl te bun tira, mahni chhungte ngei pawh hruia thlungin emaw bawmah te kan khung thin a ni a ti a. Tunah chuan thiamna bik nei,doctor ‘psychiatrist’ te pawh kan nei chho ve ta zel a, hma pawh kan sawn chho ve hret hret zel a ni a ti.

Rilru lama harsatna neite hi a enkawlna lamah doctor thiam bik leh train chhuakte bakah, hmangaihna aw nen midangte pawhin tih theih chin kan nei ve a ni Pu Hawla chuan a ti a. Midangte tana malsawmna ni tura tan lak angai a ni tiin, sorkar pawhin helamah hian nasa leh chak zawka hmalak a tum reng a ni a ti. Rilru lama harsatna neite enkawlna ah mimal, pawl, khawtlang leh sorkar angin theihtawp chhuah zel ang u tiin, kalkhawm mipuite chu chibai bukin duhsakna a hlan a ni.

Inkhawmah hian intihsiakna an siam, video clip leh essay writing a ti tha te hneneh lawmman sem a ni a. Video Clip a damlo ten taksa damna ringawt nilo, rilru damna leh hriselna a pawimawh a ni tih entirna lemchanah Pakhatna chu RIPANS in a dawng a, pahnihna Mission Foundation Movement niin, pathumna chu Mizoram College of Nursing in a dawng a ni .Essay writing ah hian thupui ‘Chronic  illness, Care giving & Mental Health’ tih inziahsiakah 1st Prize MS Dawngliana a ni a, 2nd Prize ah C.Lalzova leh H.Lalengzauva ten dawngin 3rd Prize chu S.C.Khiangte in a dawng bawk.

VOLCOMH hi hlawkna lam um lova, mahni inpekna atanga pawl anga dingin kum 1992, September ni 23 khan lo ding tan a ni a. Rilru lama harsatna neite enkawlna lama thawktu a ni.Tunah hian Board Member 14 awmin, Dr.V.Nui Hmar chu President a ni a. Adviser ah Dr.Zohmangaiha,IRS (Rtd) leh Patron ah Pu Lalthanzara, Parliamentary Secretary ani bawk a ni.