Vawiin hian Lawngtlai YLA Hall ah Anti Tobacco Awareness Campaign neih a ni a, Indian Society on Tobacco and Health Mizoram Chapter President Pi Lal Riliani chu khuallian a ni.
Vawiin a Tobacco Awareness Campaign hi Pu J. Hmingthanmawia Lawngtlai District Bawrhsap in a kaihruai a, a ni hian zuk leh hmuam chung changa Lawngtlai District dinhmun tlangpui tarlangin a do na lama hma lak dan te a sawi lang a, Mizorama hma la tha pawl tak an nih avanga lawmman an dawn thu a tarlang.
Khuallian Pi Lal Riliani chuan “zuk leh hmuam hi kan ram sum leh pai dinhmun ti hniam tu langsar, a hun hmaa kan nunna tibawrhsawm tu, kan chakna min lak kian saktu a ni a, zuk leh hmuam avangin India ramah a chhe zawngin kan thang mek bawk a, hei vang hian kan tan hmelma a ni tih i hre thar leh ang u. Natna leh thihna zawng zawng te hi zuk leh hmuam vang vek a ni chu kan ti hauh lova amaherawhchu natna leh thihna hial min thlen tu tam ber chu zuk leh hmuam vang an ni tih hi phat theih a ni lo a ni, hei vang hian kan ram mipuite min ti awngrawptu langsar ber a ni reng a ni. Chu kan hmelma chu kan dova kan hneh phawt loh chuan ram leh mipuite hian chak takin hma kan sawn thei lovang tih a hlauhawm a ni” a ti.
LADC CEM Pu V. Zirsanga pawh in thu sawiin “Lawngtlai khawpui leh a chhehvel khua te chu zuk leh hmuam ti nasa tak nia a hriat thu a sawi a, hetiang lama kan fihlim theih na tur min zirtirtu vawiin a lo kal te hi kan tan an hlu hle a ni. Sum leh pai tam taka in tanpui ai pawhin a hlu zawk hial awm e”, tiin Awareness nei tura kal te chuangah lawmthu a sawi a ni.
An ni bakah hian Pi Lalbiaksangi Joint Director (Nursing) Health and Family Welfare Department pawhin kalkhawmte hmaah hian thu sawina a nei a, Pu ZT. Vawra Hmar, District Co-Ordinator, South Mizoram, Mizoram State Tobacco Control Society in a lem nena entirin zuk leh hmuam thatloh zia kalkhawmte a zirtir bawk.
Awareness Campaign ah hian Head of Departments zawng zawng, LADC a EM zawng zawng, MJA member, Veng hrang hrang VC leh YLA hruaitu leh tlawmngaipawl dang dang te bakah School naupang te an tel a ni.
