Vawiin chawhnu dar 1:00 khan Lawngtlai DC Conference Hall-ah karleh a Lawngtlai leh Saiha tlawh a lo kal tur Chief Minister Pu Lal Thanhawla hmuah dan tur rel a ni. He hun hi Pu Beila Khitie MCS Addl. DC Lawngtlai in a kaihruai a, Lawngtlai khaw chhunga sorkar department hrang hrang hotute, LADC aiawh te, MJA leh NGO hruaitute an tel a ni.

Ruahman lawk danin Chief Minister hian April 9, 2012 ah Aizawl a chhuahsan ang a, Circuit House Lawngtlai ah thingpui in chawlh a nei ang a, Saiha a pan leh nghal ang. Saiha atangin April 11, 2012 (Nilaini) ah Lawngtlai rawn panin a riak ang a. A tuk ni 12 April, 2012 ah Thenzawl a pan leh ang.

Chief Minister hi Lawngtlai a Circuit House ah hmuah tura rel a ni a he hun ah hian sorkar department hotute, NGO, MJA leh LADC mi pawimawh te an tel ang.Lawngtlai ah hian local programme a hmanpui ang a. Chief Minister hnenah hian sorkar department hrang hrangte hmalakna report thehluh tura rel niin Chief Minister hmuahna hun a mawhphurhna hrang hrang nei turte pawh vawiin ah hian ruat fel nghal a ni.