Vawiin chhun khan Serchhip DC Office Chamber ah District Bawrhsap Pu P.Lalchhuanga hovin Sawrkar mipawimawh ten tun hnaia District chhung hmun hrang hranga kangmei chhuak tam lutuk chungchang leh heta mawhphurtute hrem dan tur chungchang an sawihova, meeting ah hian Serchhip District Superintendent of Police, Addl. SP, Addl. DC, Judicial Magistrate, SDO(Sadar), DIPRO leh Police O/C te an tel a ni.

Bawrhsap chuan sawrkarin lo hal zawh hun a ruat March ni 15, 2012 a ral hnu pawh a ram tikang an la awm fo mai chu a ngaimawh thu sawiin heng zinga tam zawk hi chu fimkhur loh leh inthlahdah vanga tih kan ni a a lan thu a sawi a, ram tikangtute man chhuak a dan hnuaia na taka hrem ngei turin Police hotute leh dan leh thupek kengkawhtute a hrilh a, hetianga kangmei tichhuak tu te hi mimal lo inngaihdam ve ringawt theih anih loh thu leh, report a awm kher loh pawhin Police ten anmahni thu a 435 IPC hnuaia thubuai an siamsak theih thu te, thiamloh chan tir an nih chuan dan hnuaiah kum 7 thleng lungin a tang turin an chungthu rel theih a nih thu te a sawi bawk.

Bawrhsap chuan dan in sapel a khap chung pawhin ramvaka sapel lui tam tak an awm ni a a hriat thu pawh tarlangin, heng sapel tu te pawh hi ram tikang tu an ni ve bawk thin a a lan thu a sawi a, Forest Department te leh Police te chu uluk leh zual a duty turin leh tumah dim lo tura a duh thu a sawi bawk.

Tun hnaia Serchhip tui tlan ber Tuikum lui tura hrai ni a report awm chungchangah pawh Bawrhsap chuan hetiang ti duh an la awm chu vanduaithlak a tih thu a sawi a, thilsual titu te chu man chhuak ngei ngei turin leh dan hnuaia an phu tawk hremna na tak pe turin thuneitute chu a hrilh bawk.

Attachment

  • Loading attachment...