Chief Minister Pu Lal Thanhawla chuan vawiin chawhnu khan I&PR Conference Hall-a inkhawm buatsaih ah kum 2011 rampum huapa Chhiarpui neiha Mizoram chhunga chenna in chungchang bik chhiarpui dinhmun tharlam ber a tlangzarh.

He inkhawm, Census Operations Director Pu H.P.Sahu, IAS kaihhruai ah hian Chief Minister chuan ram hmasawnna leh kalphung duan kawnga mihring zat leh an dinhmun chiang tak neih hmasak a tangkai zia a tarlang a. Heng Chhiarpui atang hian Sorkar chuan a khua leh tuite dinhmun leh mamawh hrechiangin hmasawnna kawnga hmalak dan turte a ruahman thin a ni tiin ram sum hnar ber pakhat chhiah lak chungchangah pawh chhiarpui hi innghahna ber pakhat a ni, a ti. Chief Minister chuan khawvel huap pawhin India rama Chhiarpui neih thin hi hna hautak bera ngaih a nih thu sawiin tun tuma Mizoram Chhiarpui hna thawktute thawhrimna leh inpekna kawngah lawmthu a sawi.

Vawiina Census Bu tlangzarh takin a tarlan danin Mizoram chhungah chenna in 2,57,581 a awm a, chumi zinga 65.8 % chu mahni ina cheng niin 31.8 % chu mi in luaha khawsa an ni a, a bak 2.4 % chu hmun danga cheng an ni. 66.3 % chu rangva/tile inchung nei a ni a; Tile bang hmang 46.1 %; Dap bang 27 %; Cement chhuat 29.3 %; Thing / Mau chhuat 63.4 %; mahni ina tui herhchhuak thei 58.7 % an awm a, Tuikhur/Lui atanga tui chawi 26.1 % an awm thung. Electric hmang 84.2 % leh khawnvartui hmang 13.5 % an awm a, Ekin nei 91.9 % awmin ekin nei lo 8.1 % an awm a, Bualin nei 65.2 % awmin nei lo 24.9 % an awm a, Television nei 55.1 %, Telephone nei 72.7 % leh Mobile phone nei 63.9 % an awm bawk.

Tlangzarhna inkhawm kaihruaitu Pu H.P.Sahu Census Operations Director chuan tun tuma Census bu chhuah thar chu uluk taka finfiah hnua chhuah a nih thu sawiin ram chhungah April - August 2010 chhunga chhiarpui neih a nih laiin Mizoram ah chuan 15 May - 30 June 2010 inkar chhunga neih a ni, a ti.