NLUP hnuaia bawngvulh thlangtu chhungkaw 29 hnenah vawiin khan Haryana bawng chi tha lo thleng thar te chu 2 zelin sem a ni leh ta a. AH&Vety department-in Durtlang rama transit camp a siamah Assembly Speaker Pu R.Romawia’n a dawngtute hnenah a hlan a ni.

Vawiina NLUP bawng dawngtute hi Selesih atangin chhungkaw 5, Durtlang atangin chhungkaw 10, Leitan atangin chhungkaw 9 leh Durtlang North atangin chhungkaw 5 an ni a. Inrinni kalta khan bawng 40 dang chu Muthi-ah sem a lo ni tawh bawk a. Vawiina sem chhuah te nen Haryana bawng lo thleng tawh zawng hi 144 a ni a, tunah hian kawng lakah 50 dang lo thleng leh mai tur an la thang mek a ni.

Speaker chuan NLUP hnuaia bawngvulh tanpuina dawngtu te chu sorkar duhsakna an dawn te chhungkaw tana eizawnna ngelnghet din nana hmang turin duhsakna a hlan a. AH&Vety department tan lakna zarah Mizoram chuan ranvulh ah nasa takin hma a sawn a. Tun hma a Zo vawk leh ar te tak te te atangin vawk leh ar lian, a sa hlawk zawk vulh nachang te kan lo hre ta a. Tuna bawng chi tha hnute tui tam chaw lut tur pawh hian Vety department chuan ngaihtuahna tam tak sengin thil a kalpui a ni tiin department hmalakna chhuanawm a tih thu a tarlang a. Ran vulh leh agriculture te chu ram innghahna tak tak an nih angin heng eizawnna peng pahnih te hi kalkawp tur leh inchawm tawn tur an ni a. Ran zun leh ek te thlai chaw a ni ang bawkin thlai pawh ran chaw a lo ni ve leh a. Ranvulh tu ten loneitute thawhpui dan an thiam a, buhpawl leh thil dang te ran chaw atan hman tangkai an chin chhoh a pawimawh hle dawn a ni, tiin Speaker chuan a sawi.

Tuna Haryana bawng lo thleng thar te hi kawng lakah ni 10 leh zan 10 rawn thangpui an ni a. Bawng te hi a rai lai deuh vek niin vawi khatah tam tak lak theih a ni bik lova. A tahtawla rawn phurh chhoh zel tur leh Durtlang transit camp atang hian Mizoram hmun danga thawn chhuak turin ruahmanna siam a ni. Bawngte hi khawtlang hruaitute hriatpuiin a dawngtu tur ten a number an pawh dan milin sem a ni a. Vawiina bawng semna hun hi AH&Vety Director Dr. L.B.Sailo in a kaihruai a. NLUP Nodal officer Dr. Daniel-an lawmthu sawiin hun hnung a khar a ni.