Zan khat riak tura Mizoram rawn tlawh, Union Home Minister Pu P.Chidambaram chu Silchar atanga Helicopter hmangin vawiin tlai khan Aizawl alo thleng a. Raj Bhawan Durbar Hall-ah Mizoram sorkar hotute, Chief Minister Pu Lal Thanhawla hovin meeting a neihpui nghal a ni.

Meeting ah hian Home Minister lokal chhan ber, Bru raltlante Mizorama an lo let leh dan tur thlithlai chungchang thu ah, Chief Minister chuan Mizoram mi dik tak, Bru raltlante chu Mizorama an lo let leh ngei theih nan Mizoram sorkar chu a inhawng reng a ni a ti a. Union Home Minister chuan tuna Tripura camp a Bru raltlan lak let leh hna chu 26th April 2012 leh 15th May 2012 inkar chhung ngeia tih fel tur a ni a ti a. Heng atana mamawh awm thei zawng zawng sum, buhfai leh transport te pawh pek vek an ni ang a ti.Tripura Sakhan Mizo raltlante pawh chhawmdawlna sum pek turte pawh pek vek an ni ang a ti bawk.

Bru raltlante chhawmdawlna pek tur chungchang bakah Mizoram police thuam that chungchangte, IR Battalion, Home Guard leh border fencing chungchangte meeting-ah hian sawiho bawk a ni.

Home Minister Pu P.Chidambaram hi Dharmendra Sharma, Jt Secretary, Internal Security, Ministry of Home Affairs, Arvind Ranjan, Special DG, BSF, A.K.Mishra, IB leh Officer lian dang pahnih in an rawn tawiawm a ni.

Home Minister pual hian Chief Minister Pu Lal Thanhawla chuan a chenna banquet Hall-ah zanriah a buatsaih sak a ni.