Vawiin khan DC Conference Hall ah Disaster Risk Reduction Day 2014 hman a ni a, Pu H. Zothangliana, Parliamentary Secretary, Higher Education chu khuallian a ni.

Pu H. Zothangliana chuan Mizoram hi leilung chanchin zirna lama mithiamten lirnghing thlen theihna hmun hlauhawm berah a awm thu an sawi thin a. Lawngtlai khawpui hnuaiah ngei pawh hian lei khi zau tak a awm thu an sawi bawk, hei vang hian engtik lai pawha inralringa kan awm a ngai a, chhiatna lo thleng tur pumpelh theilo mah ila kan inralring reng chuan kan ti nep thei thung a ni a ti. Kan kawtthler te, kan insak te leh kan bawlhhlawh leh tuichhia kan paih dan te ruahmanna mumal tak nen kan peih a tul a, vawiin a kan kalphung hi chuan lirnghing leh chhiatna dang laka invenna kawngah duhthu a sam lo hle a ni a ti bawk. Mitin ten kan inchhungah ruahmanna fel tak kan neih a tul thu a sawi bawk a, eitur dah rei theih chi te, torch light te, tui thianghlim te leh a theih chuan radio te pawh emergency pack siama kan lo dah a kan inbuatsaih a tha hle a ni. Hei hi ram tam takah a thatzia a taka finfiah a ni tawh a ni tiin kalkhawmte hmaah a sawi bawk.

He hunah hian Pu Vanlalhmachhuana MCS i/c DM&R chuan a lem nena entirna chhiatna lo thleng thut laka inven dan leh a tihnepna tura hmalak dan hrang hrang te a tarlang a ni.

Inkhawm kaihruaitu Pu J. Hmingthanmawia, Bawrhsap pawhin thu sawiin kan dinhmun hi Central lam pawhin min hriatchian avangin uar takin inzirtirna lam min neih pui reng a, min ngaihsakna hi lawmawm viau mahse a taka kan tawn hunah tangkai takin kan hmang theilo ang tih a hlauhawm a chuvang chuan hetiang kawngah hian mipuite kan thangharh a tul hle a ni a ti bawk.

Kumin a Disaster Risk Reduction Day thupui chu “Chenna In him leh khawtlang inbuatsaih (Home Safety and Local Preparedness) tih a ni.