Agricultural Technology Management Agency (ATMA) Lawngtlai District buatsaih ni hnih awh tur District Level Agricultural Exhibition (Kisan Mela) chu vawiin khan Lawngtlaia Dokulha Hall-ah District Bawrhsap Dr Arun T., IAS chuan a hawng.

Lawngtlai Bawrhsap chuan Pu Nehru-a’n, “thlawhhma tul aia buaipui hmasak ngai zawk thil dang a awm lo,” a tih thu sawiin, agriculture lama hma lakna chu sawrkar pawhin a ngaih pawimawh hmasak ber a nih thu a sawi a. India ram leh Mizoram mipui tam zawk chu agriculture leh a kaihhnawiha ei bar zawng leh innghat an nih avang leh chumia innghat lem lo mi dang zawng pawhin kan mamawh vek a nih avangin hemi lamah hian hma sawn zel a tul a ni, a ti a. ATMA chu kut hna thawktute kaihruai a, zirtirna petu, thlai chin, enkawl leh deh ral dan tha zawnpuitu a nih thu sawiin, kut hna thawktute thar chhuah a pun deuh deuh theih nan nasa zawkin tan la zel se a duh thu a sawi.

Exhibition hawnna hun hi Lawngtlai District ATMA Project Director, Lawngtlai DAO Pu J. Rokima’n a kaihruai a. ATMA Deputy Project Director Dr M. Chinlampianga’n Kisan Mela an buatsaih dan leh an kal chhohpui dan turte a sawi fiah a. Lawngtlai DHO Pu L. Lalhmingmawia Pachuau pawhin exhibition neih tangkaina leh, kut hna thawh kawnga mi dang cho phurtu leh tan petu a nih thin thu sawiin, Sangau Block BTM Pu Sanglawtthanga Khenglawt chuan lawm thu a sawi bawk.

He Kisan Mela hi December ni 14-15 chhunga neih tur hi niin, Lawngtlai District-a Block hrang hrang pali – Bungtlang, Chawngte, Lawngtlai leh Sangau Block atangin kut hna thawktute’n an thil thar chhuahte an pho chhuak a. Thei leh thlai leh thil deh chhuah dang chi 43 pho chhuah niin, item tinah hian lawmman a hran theuhva siam a ni ang. Hei bakah hian sawrkar department paruk – Agriculture; AH & Vety; Fisheries; Horticulture; Land Resources, Soil & Water Conservation leh Sericulture Department te, Self Help Group, Food Safety Group, Lawngtlai Florist Association leh kut hna thawhna hmanraw zuar mimal dawr te an inpho ve bawk a. An thil phote hi lei theih nghal niin, AH & Vety Department chuan a thlawna ran entirna vety clinic an hawng tel bawk a ni.