Vawiin khan Sawrkar Laipui Ministry of Youth Affairs and Sports hnuaia Nehru Yuva Kendra Sangathan (NYKS), Mizoram huaihawtin Lunglei Press Club, Bazar Veng-ah thalaite tana thu insawisiakna 'State Level Declamation Contest' buatsaih a ni a. Pu SR Bishnoi, State Director, Mizoram Nehru Yuva Kendra Sangathan in a hmanpui.

Pu SR Bishnoi chuan State Level Declamation Contest ah Mizo thalaite phur taka an rawn tel chu lawmawm a tih thu sawiin nakin lawka ram leh hnam hruaitu an la nih dawn avangin lehkha zir piah lamah ‘personality development’ leh ‘communication skills’ lama intuaihriam turin a chah a. Kan thalai rual ten ram an hmangaih chuan hmasawnna chak tak kan nei thei dawn a ni tiin NYKS State Director chuan intihsiakna a tel zawng zawng te chu hun lokal zel tur atan duhsakna a hlan a ni.

He hun hi NYK Lawngtlai District Youth Coordinator (DYC) Pi Mercy Sellate chuan a kaihruai a. Declamation Contest buatsaih a nih chhan leh Contest an huaithawt dan tlangpui a sawifiah a. He declamation contest hi India Republic Day 2018 puala rampum huap thalaite inelna tur niin India ram State tinah Block level, District level leh State level ah te intihsiakna hi buatsaih a ni a. He intihsiakna thupui hi “Patriotism and Nation Building” niin thalaiten mahni ram hmangaihna rilru an put nan leh India ram hmasawnna kawnga rilru thar an put theihna atana hmalakna peng pakhat a ni.

Declamation Contest on Patriotism and Nation Building chungchang insawisiakna ah hian Pi C. Lalremruati, DIPRO Lunglei, Pu Lalsawmliana Chinzah History Head of Department, Government J Buana College leh Pi C. Lalnunpuii, Assistant Professor, English Department, Lunglei Government College te chu endiktu an ni a.  State Level Declamation Contest on Patriotism and Nation Building  lawmman latute chu :

1st Prize :      B. Lalthlamuanpuia – Lawngtlai District (Certificate + Rs.25,000/-)

2nd Prize :     Vanlalvena Ralte Kawlni – Lunglei District (Certificate + Rs.10,000/-)

State Level intihsiaknaa pakhatna B. Lalthlamuanpuia, Lawngtlai District hian January thla chhunga neih tur India ram pum huap inelna ‘National Level Declamation Contest’ -ah Mizoram aiawhin a tel dawn a ni.