Vawiin khan DC Conference Hall ah faina hapta 2014 kharna inkhawm neih a ni a, Parliamentary Secretary for Higher & Technical Education Pu H. Zothangliana chu khuallian a ni.
Thu sawiin khuallian chuan faina hian kan nun kawng tinrengah a tha zawngin nghawng tam tak a nei a, zahawmna te, hriselna te, hnathawk thei tura taksa chak leh tlo neih na te leh kawng hrang hranga changkanna a ni a, hei vang hian faina leh thianghlimna hi a hapta kan hman chhung chauh a uar lovin kumtluan in kan thianghlim reng tur a ni. Ram leh hnam changkang apiang an thianghlimin an fai a, keini pawh chutiang ang chuan kan awm ve thei a ni tih kan hriat a tul a ni a ti. Khawchhung a thianghlim tawk loh avangin sum leh pai tam tak a luangral thin a, kan tuichhe luankawrte bawlhhlawhin kumtluan in a hnawh ping a, kan thli felfai takin kan paih lova, hmun tinah bawlhhlawh kan thehdarh a chung te chuan leimin leh harsatna dang min thlen cham chi a ni. Chhiatna kan tawrh tam tak te hi keimahni siam an ni fova a mawi zawngin an vanduai/kan vanduai kan ti leh ringawt thin. Kan thianghlim loh chuan kan bawrhsawm zel anga hmasawnna a kal chak thei hek lovang tiin a sawi bawk.
He inkhawmah hian faina hapta chhunga intihsiakna hrang hrangah lawmman sem a ni a, lawmman dawngtute chu hetiang hi a ni.
Veng fai lawmman : 1) College Veng ; 2) Chandmary Veng ; 3) Bazar Veng.
School fai lawmman: 1) Govt P/S -1, Chandmary. 2) Govt. M/S, Chawnhu ; 3) Govt. P/S Electric Veng
Office fai lawmman : 1) PWD Road Division ; 2) DRDA ; 3) SP Office.
He inkhawm kaihruaitu, Bawrhsap, Pu J. Hmingthanmawia chuan faina hapta hman chhunga sawrkar department hrang hrang, LA DC, tlawmngaipawl, MJA leh mipuite tawiawm naah lawmthu a sawi a, kumtir atanga theihtawp chhuah a faina lama beitu LADC Sanitation Department chungah a bik takin lawmthu a sawi bawk.
